Активносци младих

автор Ц. Надь 17. януар 2017

Млади активни, и то мож замерковац по збуваньох хтори орґанизую каждого року у вецей руских местох. Даєдни зоз нїх уж постали традицийни, а „шветло” збачели и нови змисти хтори обдумали млади. У шлїдуюцих шорох ше здогаднєме на иновативни, найупечатлївши и найнащивенши збуваня.

Прешлого року, у просторийох Руского културного центра (РКЦ) у Новим Садзе отримани вецей цикави подїї. Найбаржей „вискочели” два, хтори були цикави младим. Вшелїяк то програма „Дзе(нь) младосц(и)?” и тема „Еротика Рутеника” по записох Володимира М. Гнатюка. На тим вечару була представена вистава фотоґрафийох Андреи Новак, зоз рускима мотивами, а тиж Александра Лендєр публики бешедовала о еротичних записох у рускей литератури, хтори зазберовал Володимир Гнатюк. Мирослав Малацко пречитал даєдни з тих записох, котри обявени пред вецей як 20 роками у кнїжки „Еротика Рутеника”. Кабаре хтори бул виведзени представял єдну вельку нєкаждодньовосц, а Александра Колбас, Саня Дивлякович и Танита Ходак, одшпивали даскельо народни и двосмислово шпиванки.

Нова програма „Акустика Рутеника” першираз отримана 23. септембра, тиж у просторийох РКЦ. Циль того музичного вечара бул обробиц руски народни и забавни шпиванки на иншаки и нови способ. Додзелєни и награди за найлєпши перформанс, найкреативнєйши наступ, як и награду публики. Младежска програма „Литературиюм”, з хтору започало означованє 70-рочнїци иснованя нєшкайшого РКЦ у Новим Садзе, отримана 18. новембра.

У Дюрдьове, у просторийох КУД „Тарас Шевченко” 30. авґуста отримани „Гаваї парти”. На пиятей, по шоре, журки було надосц нащивительох хтори були „поприберани” и мали „гаваї” мотиви. Тот прави „лєтнї” парти вше ошвижи шицких присутних. Тиж, у дюрдьовским КУД-у 19. новембра отримани перши Бал младих. Идея о Младежским балу постояла уж даскeльо роки, алє аж тераз дозрела, а домашнї були задовольни зоз одволaньом младих, та мaю у плану же би тот бал постал традицийни.

У Коцуре, 2. юлия, младеж з КУД „Жатва” орґанизовала вечар хтори бул пошвецени филму, односно отримани биоскоп на отвореним з мотом „Париз за углом”. На платну, хторе було поставене у дворе ОШ „Братство-єдинство”, нащивителє могли патриц три филми чия ше дїя одвива у Паризу, а могло ше и фотоґрафовац з

реквизитами хтори символую Французку. Шесту роботну акцию младих „Дай и ти свою руку” орґанизовало Коцурске здруженє младих (КУМ) од 22. по 24. юлий, на хторей участвовали коло 100 акцияше з Коцура, Руского Керестура, Дюрдьова, Вербасу, Нового Саду, Беоґраду, Краґуєвцу и других местох. През вшелїяки забавни, едукативни, рекреативни и духовни змисти млади ше дружели, а зоз роботнима акциями помогли валалу.

Прешлого року у Руским Керестуре 23. юлия, на базену, отримана друга лєтня журка на отвореним „PactON 2.0”. Наступали „Лазамерс” з Оджаку, „Crazy Cousins” и „Drop Sensei”. Тот вечар орґанизoвал „Pact Ruthenorum”, а нащивеносц була велька. Вечар пред журку, на истим месце орґанизовали и биоскоп на отвореним.

„Дньовка”, 19. по шоре, отримана 26. новембра, у велькей сали Дома култури у Керестуре. Патраче могли одпровадзиц богату мултимедиялну програму, хтора була пополнєта зоз музичнима точками, танцом, поезию и зоз стенд-ап комедию. „Дньовку” орґанизовало здруженє младих „Pact Ruthenorum”, а учашнїки були млади зоз рижних местох – зоз Керестура, Дюрдьова, Нового Саду, Петроварадину и Зомбора.

На „Дньовки” ше представели Славко Колошняї, Мирко Пап, Роберт Загорянски, Жарко Остоїч, Михаил Рамач, Марина Роман, Николина Шарич, Кристина Афич, Павле Рац, Себасиян Надь, Михаїл Римар, Мария Римар, Тамара Салаґ и Давид Салаґ. Як часц тей манифестациї розписани и конкурс за авторски фотоґрафиї на тему „Бунт”. Прешлого року було слабе одволанє на тим конкурсу, прето же сцигли лєм осем фотоґрафиї трох авторох.

Идеї вше постоя, сцелосц при младих присутна, а важне реализовац задумане.

У „тиму” лєгчейше робиц, а на младих остава же би з рока нарок отримовали уж постояци збуваня, як и же би були ориґинали у здумованю нових.

(Опатрене 101 раз, нєшка 1)