Будовац кирилометодску заєднїцу

автор олр
1k Опатрене

БЕОҐРАД – Всоботу, 26. мая, вирни беоґрадскей парохиї святочно преславели своїх покровительох – св. Кирила и Методия, а источасно и свою манифестацию Руснацох у Беоґрадзе – Кирбай.

Святочну Службу предводзел и наказовал керестурски парох о. ставрофор Михайло Малацко, у сослуженю зоз керестурским капеланом Владимиром Медєшом, о. Петром Ташев и Леонидом Бевза зоз Беоґраду, як и зоз домашнїм парохом о. Варґом.

Як паноцец Малацко наглашел, важне будовац парохиялну заєднїцу, та гоч вона и нє велька, алє квалитетна, ядро и маґнет котри будзе з часом прицаговац и других прейґ єй моцного автентичного шведоченя.

Церковне шпиванє провадзел дзияк новосадски Йовґен Надь, а вирни ше после Служби позберали у церковней сали же би ту означели свой окремни дзень и упознали нових членох, а за тоту нагоду домашнї пририхтали и богати аґапе.

На Кирбаю присуствовали госци числених националносцох и вирох медзи котрима архидиякон др проф. Радомир Ракич зоз Сербскей Православней Церкви и др Иґор Дюрчик зоз Анґликанскей ортодоксней Церкви, а винчованки послала и фарарка словацкей Єванґелицкей Церкви а.в. панї Ана Петрович.

Духовна присутносц ше чувствовала и з боку нашого владики кир Георґия а окремни поздрав послал и амбасадор України Олександер Александрович котри бул истого дня на манифестациї у Новим Садзе.

Красней и радосней атмосфери допринєсол пан Йовґен Надь, котри на ґитари грал и шпивал руски и українски писнї.

ПОВЯЗАНИ ТЕКСТИ