Важне буц културни

автор борис сакач 4. май 2017

Глєдали зме, конкуровали и достали! Нови Сад достал з боку Европи можлївосц буц город култури 2021. року. То факт. Перше – то будзе тирвац єден рок. Лєм єден рок! А, култура, то обласц нашого животa котра тирва нєпреривно, уж хто зна од кеди и будзе и после нас, покля єст людзох.

У другей половки ХХ вику ше зявели радио, телевизия и на концу интернет, котри принципиєлно нє принєсли нїч нове, цо зме уж нє видзели, алє нам вошли до обисца. У каждим случаю, патраци так зоз терашнього часу, як хвильково найвисшого ракурсу на шицки продукти котри нам култура понукала, можеме обачиц же вона припадала надбудови, у першим шоре елити. Наприклад, же биш читал, мушел ши буц писмени и то була длуги час привилеґия лєм за меншину. Медзитим, нови дружтвени рухи, а насампредз економия, указали же ше муши подзвигнуц общи уровень знаня популациї през образованє, прето же нови технолоґийни продукти можу хасновац лєм образовани людзе.

И так зме сцигли по 2021. рок, рок култури у Новим Садзе. Ми, хтори ше народзели у Новим Садзе и чийо предки тиж так росли у городу, мали зме нагоду хасновац продукти култури цали час у єдним мултикултуралним штредку, прето же нас уж вони на тото унапрямовали. То випатрало так же зме у обисцу бешедовали по руски, а продукти култури углавним хасновали на сербским язику. Того зме анї нє були свидоми, алє зме пре вигодни економски живот мали понукнути културни змисти, од аматерского, прейґ професионалного аж по госцованя визначних културних дїячох зоз иножемства. Гевто цо було важне, кажде ше намагал посцигнуц максимум у своїм фаху, бо конкуренция на каждим крочаю велька, а непотизем и подобни зявеня були ридки и допущени лєм одредзеним ґрупом. Прето материялни стан у городу приоритет, бо на балконох евентуално рошню лєм мушкатли и нїч вецей; на столє треба у каждей хвильки обезпечиц фалат хлєба, а спортски, културни, духовни и други аспекти живота у другим плану, алє су доступни.

Од половки осемдзешатих ше обачовал вше векши уплїв новей компоненти, окрем економиї – була то политика! Дахто би повед же то так було и скорей, алє цензура була на тельо моцна и швидка, же до нас сциговали лєм уж филтровани вистки, та зме нє мали о чим анї вельо дискутовац, а анї роздумовац. Ситуация ше драматично пременєла початком дзеведзешатих, кед ше перше пременєла политична, вец економска, а потим и демоґрафска слика у городу, и нє лєм у городу, алє и у держави. Город постал два раз векши по числу жительства и понукал и далєй свойо продукти култури. Медзитим, число конзументох тих продуктох ше нє звекшало, алє напроцив, зменшало пре иншаки смаки, афинитети, менталитети, емоциї…

Тота нова компонента, политика, постала доминантна, бо пре нови (за нас) технолоґиї масовних медийох обачене же вони маю феноменални уплїв на цалу популацию и прето ше и дзень нєшка максимално експлоатую. Економия и так була цалком препаднута, а так випатра и нєшка, а зоз ню вєдно и надбудова – култура. Елита, о котрей сом бешедовал, при векшинскому народу иснує лєм у материялним смислу, їх „културни” потреби видзиме през тото котри ше телевизиї найвецей патра и финансую! Но, у Новим Садзе ище вше єст моци же би ше голєм понукло дацо вецей у смислу квалитету и рижнородносци културних продуктох, цо нє значи же би нє могло ище вецей.

Прето же у паметаню тих цо росли у городу ище вше жию слики зоз прешлосци, нє лєгко ше тераз злагодзиц зоз понукнутим змистом и ришенями котри нам понука дньова политика, котра ма потребу и далєй тримац под свою контролу абсолутно шицки явни медиї. Гевто цо ище горше од того, то факт же зоз нашима центрами котри водза и одлучую у нашо мено о култури, управяю людзе опортунисти котри пришли зоз малих монокултуралних штредкох, зоз своїма талантами, амбициями, алє и фрустрациями и комплексами зоз найчастейше нєадекватну приготовку. Цо ище траґичнєйше, вони анї нє жию у городу, алє лєм доходза ту робиц, так же нє маю нагоду активнєйше уживац продукти култури котри ше ту понукаю. Зоз того боку патраци, можем повесц же су углавним кратковиди, можебуц нє пре самих себе, алє прето же су нє шлєбодни, бо лєм окончую свойо партийски задачи.

Перша диґресия: У цеку ІІ шветовей войни, у британским парламенту, чий тедишнї премиєр бул Винстон Черчил, водзела ше оштра дебата о тим же як змоцнїц финансийну и воєну моц и зопрец напредованє нацизму. Єден од дискутантох предложел же би ше утаргло министерство култури и на тот способ зашпоровали средства. На тото предкладанє, Черчил лєм гварел же кед ше то пороби, вец нєт причини ше бориц и бранїц, бо цо ше вец будзе охраньовац у Британиї! Наша терашня власц барз зменшала средства за културу – цо нам то гутори?

Друга диґресия: Пред 100 роками Нови Сад мал два аеродроми, цивилни и воєни. Тиж так мал два цивилни желєзнїцки станїци и єдну терховну. Були зме у огромней держави котра мала план и циль, и нє мала политичарох котри були на власци, алє цали час робела на децентрализациї, бо лєм задовольни гражданє буду дзечнє плациц порцию! Прецо сом то спомнул? Прето же у тедишнїх економских обставинох у Сримских Карловцох основана перша сербска ґимназия, у Новим Садзе основана Матица сербска и Сербски народни театер. Ми, хтори жиєме у Новим Садзе и Войводини, ище дакус та уж три децениї плациме найвекшу цену централизациї, а од ровномирного розвою шицких реґионох у держави, лєбо даякого плану, нєт нїч.

Треца диґресия: Важне мац новосадску особну карточку, бо вона доказ же особа отвореного, щирого духа котра ше зна бориц, отримац и затримац у городу, а з другого боку є порихтана помогнуц каждей другей особи котра ше лєм почина знаходзиц у таким новим штредку. Важне буц културни.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 187 раз, нєшка 1)