Викрок зоз зони комфора

автор саб 12. авґуст 2017

Вецей нє мож иґноровац даскельо неґативни тренди хтори  остатнї час провадза сполньованє правох з обласци културней автономиї меншинских заєднїцох у Сербиї и АП Войводини, и пре хтори ознова треба роздумац о приоритетох и потераз применьованих моделох єй запровадзованя. Дзепоєдни з нїх пошлїдок природних цекох, дзепоєдни дружтвених обставинох, а дзепоєдни комбинация обидвох причинох. Наприклад, неґативни демоґрафични тренди и депопулация дзешка у тей сфери и уплївую на отриманє дотерашнїх моделох образовней политики меншинских заєднїцох. Медзитим, нови дружтвено(политични) обставини, чий ефект найєдноставнєйше описац як „менєй пенєжи за меншини”, найбаржей уплївую на широку обласц култури. Окреме кед ше треба операц лєм на домашнї жридла, без помоци звонка, цо углавним и наш случай.

Мож ше гнївац, нє робиц нїч и чекац да ше дацо пременї, лєбо ше мож попробовац прилагодзиц новим обставином. Кед ше раз пременя, лєгко ше будзе ознова врациц на лєпше. Найчежше будзе „скрациц фронт” и отворено розпатриц чи нам наисце нєобходна културна манифестация од националного значеня кажди други тидзень. Понеже ше концепт Националного швета меня, а озда кажде уж гварел и порадзел цо треба меняц на „Ружи”, пришол час же би ше з исту дозу критичносци рушело и по других руских хотарох.

Насампредз, сами мушиме висц зоз зони комфора и пременїц тренд же ше вше баржей операме лєм на руски жридла, бо там конкуренция менша и так лєгчейше. З таким приступом, барз швидко висохню. Як, медзитим, звекшац конкурентносц на ширшим полю, у векшинским окруженю? Дефиницию нє мам, алє ниа даскельо приклади: Обнова найстаршей рускей хижи у Керестуре, хтора после длугей борби конєчно почала, финансує ше з покраїнских жридлох. Суґестия же би ше преслава Дня Руснацох 2021. року отримала у Новим Садзе  кед тот город и Европска престолнїца култури ма огромни потенциял, а по подобним моделу понука ше и Керестур 2020, кед означуєме шумну, округлу 275. рочнїцу приселєня. Уж на рок, вихасновац би даяк 100. рочнїцу „присоєдинєня” хтора, без сумнїву, будзе державна подїя рока…

(Опатрене 120 раз, нєшка 1)