„Виходнярска Кока-Кола” найлєпши лїк

автор зам
773 Опатрене

РУСКИ КЕРЕСТУР – На Драмским мемориялє Петра Ризнича Дядї всоботу, 25. марца, ансамбл аматерского „Театру при фонтани” з Михаловцох, зоз Словацкей, по „виходнярски” одбавел комедию „Жимне вре”, з чим предлужене сотруднїцтво Мемориялу и драмских аматерских ансамблох з восточней Словацкей, як цо то даскельо роки було з госцами з Кладзанох.

Авторка интересантного тексту, хтори добре нашмеял числену керестурску публику, Катарина Варехова, котра и ґлуми у представи, а на сцену ю поставели Гелена Андреєва (тиж и єдна з ґлумицох) и Єла Тимкова. Слово о збуваньох у явним тоалету виприповеданих през очи и дожица панї котра ше о нїм стара – „Гайзли-дами”, як поведзене у представи.

Главну улогу прешвечлїво одґлумела Людмила Дюрчакова, котра у тих стретнуцох з рижнима особами у явним тоалету и лїкарка и психо-терапеут и особа за бешеду, а у тим єй добре помагал Ян Главач у улоги „Корнела”, чловека котри ше з окремним почитованьом одноши ґу шицким, окреме ґу роботи и самей жени котра роби у явним тоалету.

З представи патраче дознали и цо то „Виходнярска Кока-Кола”, як лїк за шицки брухово и жалудково проблеми, з хторим „Гайзли-дама” помага хасновательом тоалету. А то прости стародавни и преверени лїк – сода-бикарбона з воду и кус есенцу, хтора „на жимно вре”. Но, тота „Виходнярска Кока-Кола” у ствари красне слово и одношенє ґу шицким, а насампредз оптимистичне патренє на живот и ришованє  почежкосцох. 

Публика з аплаузами на отвореней сцени под час представи и длугим кляпканьом на концу щиро наградзела аматерох з Михаловцох, а на приємним друженю после представи госци и домашнї вичерали дарунки.

Свойо упечатки о пребуваню у Керестуре главна ґлумица, панї Дюрчакова, котра иншак старостка Михаловцох, кратко прекоментаровала: „Телї километри зме прешли, а ту нашо людзе!”.

(Вецей фотоґрафиї з представи на правим боку нашого сайту).

ПОВЯЗАНИ ТЕКСТИ