Вишло нове число „Заградки”

автор рим
676 Опатрене

НОВИ САД – Вочи лєтньому розпусту вишло остатнє число (двочисло юний-юлий на 28 бокох) часописа за дзеци „Заградка”.

На насловним боку предшколски дзеци зоз Руского Керестура, Коцура и Дюрдьова зоз виховательками на своїм традицийним Стретнуцу. Вецей о тей подїї дознаце на 2. боку, дзе и кратки вистки о означованю Дня школи у Руским Керестуре и у Коцуре.

За литературну часц писнї и приповедки о єдней коритнявки, о купаню на морю, на беґелю, на базену лєбо рики написали писательки Серафина Макаї, Ксения Варґа и Мелания Римар, а преложени зоз сербского ту приповедки Катарини Челикович, Александри Урошевич и Весни Чорович Бутрич. У „Малей заградки” описани боксере Мирко и Микола, єден кандурик Марко и гербни когути, а малюнки за тото число послали наймладши дзеци зоз Руского Керестура, Коцура, Дюрдьова и Бачкей Тополї.

Штири боки часописа пошвецени школяром ґенерациї и даскелїм Вуковцом, а на двох бокох обявени школярски состави наградзени на Смотри кириличней писменосци у Тителу. Од вистох зоз школох видвоєне Републичне змаганє з руского язика, а хто бул перши горяк и хтори город найменши на швеце, пречитайце на 27. боку.

Шлїдуюце число „Заградки” видзе як двочисло за авґуст и септембер накадзи почнє нови школски рок.

ПОВЯЗАНИ ТЕКСТИ