Гранїци достоїнства

автор александар саванович 11. фебруар 2017

През шицки дружтвени, политични и економски кризи, хтори ме, нажаль, провадза скоро през цали дотерашнї живот, корци ме питанє – цо мира и дзе гранїца людского достоїнства и кельо зме порихтани церпиц и лїґац, покля ше швет доокола меня, очиглядно, на нашу чкоду?

И вец сцигню сцени зоз площох румунских городох. На стотки тисячи людзе вишли на улїчку протестовац процив уредби Влади Румуниї по хторей ше декриминализує корупция кед слово о пенєжу меншим од 200 000 леї (кус менєй од 50 тисячи долари), цо директно знїма одвичательносц з велїх функционерох хтори „крадуцкали”. Уж перши дзень дзешатки тисячи Румунох протестовали у векших городох, бунт ше ширел и, док тото пишем, стотки тисячи гражданох на улїчки вимагаю одвичательносц од нєдавно формованей Влади. Глас народу там цошка вредзи – спорна уредба поцагнута, дзепоєдни єй иницияторе уж задзековали, алє то нє досц – тераз ше вимага задзекованє комплетней Влади хтору водзи социялиста Сорин Ґриндеану. Нє випатра же протестанти одустаню од тей вимоги, бо кед народ видзе на улїцу, чежко го зопрец. Окреме же часц власци, насампредз предсидатель Румуниї, Клаус Йоанис, потримал вимогу протестантох.

Дружтвени мрежи у Сербиї з дня на дзень жадно провадза протести у Румуниї. Так як цо и 1989. року, лєм теди без интернета, зоз симпатиями провадзели побиду народу и конєц Чаушескуового режима.

А ми? Цо нас нєшка може нагнац же бизме вишли на улїцу? Економски момент? Бида? Кед думаце же наш народ нє виходзи на улїци, спреведаце ше. Просеково 30 тисячи гражданох Сербиї до рока  першираз видзе на улїци Канади, Нємецкей и вшадзи там дзе ше наздаваю лєпшому животу як цо го ту мали. Кед бизме тоти числа помножели лєм з роками од 2000, нє рахуюци дзеведзешати, и кед би тоти людзе остали у жеми, була би то критична маса хтору би  кажда власц мушела респектовац. Дакеди полни площи з дзеведзешатих тераз празни, а кадри з Румуниї лєм здогадованє же дараз анї у Сербиї достоїнство нє було таке тунє. Можебуц шлїдуюца ґенерация нє  да на себе, можебуц єй достоїнство нє будзе на предай. Лєбо похопи же го лєгчейше зачувац дзешка вонка.

(Опатрене 79 раз, нєшка 1)