Два побиди Русиновцох

автор мар
910 Опатрене

РУСКИ КЕРЕСТУР – На штвартим турниру у ярнєй часци сезони у рамикох Лиґи младших катеґорийох до 14 рокох, котри отримани всоботу у Спортскей гали у Руским Керестуре, рукометаше „Русину” зазначели два упечатлїви побиди.

Перше змаганє Русиновци бавели процив екипи „Далматинац” зоз Ридїци, котре закончене зоз резултатом 15:10 (6:4), у другим змаганю победзели екипу „БСК 2012” зоз Бачкого Брестовцу з резултатом 17:13 (5:4). На турниру у Керестуре за Русин бавели Давид Надь (7), Ковачевич (6), Пашо (5), Ґовля (5), Стойков (4), Максимович (3), Чордаш, Планчак (1), Гарди (1), Накич, Дудаш, Няради, Шимек, Дарко Надь, а ґолманє були Зорич и Новта. 

Судийове на Турниру були Антич и Ковачевич зоз Червинки, а делеґат Йован Йокич зоз Сивцу. У орґанизаци турнира помогли Драґан Ковачевич, предсидатель Спортского дружтва „Русин”, Владимир Грубеня и Виктор Микита, а як медицински роботнїк Ивана Шомодї. Рукометашох пририхтали Злата Паплацко и Владимир Планчак

Екипа „Русину” ше и далєй находзи на штвартим месце зоз 10 бодами у Першей лиґи ґрупи А, дзе после осем одбавених змаганьох маю зазначени пейц побиди и три пораженя, дали 110 ґоли, а їх мрежа ше затресла 95 раз.

За „Русин” то солидни пласман, цо потвердзує и сам квалитет бавячох. Першопласована екипа у ґрупи А то „Ґрафичар” з Бездану зоз 16 бодами, другопласовани „Спартак Войпут” зоз Суботици з 12 бодами, а трецепласовани „Далматинац” зоз Ридїци ма 10 боди, як и „Русин”, лєм є у предносци пре векшу ґол розлику (19). На пиятим месце екипа „Апатин” ма 6 боди, а на шестим екипа „БСК 2012” зоз 2 бодами, а на седмим месце „Зомбор” котри ище вше нє ма анї єдну побиду.

ПОВЯЗАНИ ТЕКСТИ