Елита, култура и монопол

автор мирон джуня 18. фебруар 2017

Задумал сом ше над вираженим задовольством єдного нашого предняка же Руснаци вошли до кругу елитней култури – виявеним з нагоди отвераня вистави о Руснацох у Етноґрафийним музею влєце у Беоґрадзе.

Кулоарски бешеди з „Руского” жию у паметаню старших колеґох вязани на конфликт Юлияна Надя, теди як редактора „Литературного слова” з старшима „факторами‟ у хижи. Єден з важнєйших, кед нє и круциялни, була свойофайтова цензура чи лєм доганянє Надьовей намири представиц Ендия Ворхола у додатку. Бо – „На цо то Руснацом?‟ Слово о концу осемдзешатих, нєпоштредно пред Надьовим вчасним и траґичним концом.

Тераз, кед ше полемизує на дружтвених мрежох чи би скулптура Ворхолови мала буц поставена у Беоґрадзе, чи у Керестуре, мнє баржей цикави контекст у котрим ше тото одбува. Мая Ґойкович, єдна з главних аґитаторох за тото подняце, отворено ше пиши як приведла виставу з Музею у Медзилаборцох до Нового Саду гинто кед була городоначалнїца, бо гат – вона ше озда розуми до сучасней уметносци, котру люби. За котру ше афирмативно виражела кед на лоньским отвераню вистави о неґативним писаню медийох о Вучичови, у   орґанизациї СНС, подїю поровнала з концептуализмом Марини Абрамович. Треба повесц же компетентни людзе, з музейох, историчаре уметносци без одвиту лєм одмахли з руку новинаром кед им то спомли?

Прето, кед ше злучує у єдней синтаґми слова елита и уметносц-култура, вше якош поцерпам же ту резултат водзи ґу кичу и шунду, на яки ю редукую малогражданє котри розполагаю з политично материялну моцу, цо у держави дзе жиєме аж и пребарз очиглядне. Подобно як цо ше зашнїцує у своїм одумераню меншинска култура препущена тарґовищу-пияцу (формуловал Тамаш старши у ЛС кед сом го ушорйовал 2003.-го). Лєм же перше бизарне, а друге траґичне. А обидва поняца сущни за кажду културу, друге и за Руску: компетенция о уметнїцкей вредносци и єй, нїч менєй важни – ресурси за презервацию.

Е, тераз же цо и як у нас функционує – препущуєм на полемизованє нєпоштреднєйшим партиципантом и интересентом. Гоч – нє жиєм у илузиї же би то дакого могло интересовац.

(Опатрене 148 раз, нєшка 1)