Етикета

автор каролина папуґа 22. май 2017

Од шицких роботох найлєгчейша лїпенє етикетох. Наисце лєгка робота: вивалїш язик, олїжеш етикету и залїпиш ю на жену. Може и так: плювнєш на жену, та залїпиш етикету.

По векшини релиґийох, жена єство створене же би правело дружтво хлопови. През историю и по чловеческих законох, менєй важне и часто огранїчоване єство. Особа котрей найчастейше место у кухнї, зоз завартима устами, а ище баржей завартима поглядами на швет. Ма окремну функцию – буц цихо, махац з главу слухаюци свою „моцнєйшу” половку и цо менєй роздумовац зоз власну главу. Охарактерована як слабши пол, осудзена же є емотивно нєстабилана. Жена. Женски права и жаданє же би була єднак третирована ище вше нє витворени.

Дараз жени були спальовани як „босорки”, прето же у одредзених обласцох знаня себе кладли опрез хлопох. А то ше нє могло церпиц. Нєшка, после телїх рокох и цивилизацийних напредованьох, жена ше ище вше муши ознова и ознова доказовац же є достаточно добра за цали швет. Ище вше постоя думаня котри жени кладу до другого шора без валидного толкованя и арґументованя.

Сексизем, дискриминация и хлопска доминация ище вше творя бездну у медзилюдских одношеньох. И цо жена достала? Рижни етикети. Там дзе жена лєгка, хлоп будзе фраєр. Там дзе жена стара дзивка, там хлоп „бавяч”, з роками вона постава устарена, а вон „Джек”. Таки назви, односно етикети нє преставаю ту, цо ше голєм женох дотика.  Половняча, паченица, спонзоруша, плавуша, милфара… Маю тоти назви и свою лоґику по котрей настали: стара дзивка то особа женского полу котрей ше нє удало одац ше (а же можебуц нє сцела? Нє, то нєможлїве!), половняча особа женского полу котра розидзена, кус старша алє ма и дзецко, милфара то особа женского роду штреднїх рокох котра достаточно добре випатра же би ю хлопи ище вше могли пожадац. Алє, шицки тоти етикети бридки и нєпотребни. Думам же вельо вецей гуторя о тих котри их хасную. Указую страх же жена досцигнє свойо потенцияли и укаже свойо способносци до конєчних гранїцох. Прето єй на тей драги лїпя бридки и знєважуюци етикети.

Примитивизем, суєта, зависц, шицки ґрупи, подґрупи и комбинациї истих ше нє можу викоренїц, того зме шицки свидоми, а людзе зоз такима характеристиками нїґда нє глєдаю позитивни прикмети, алє хиби. А праве тото найлєгчейше найсц. Реално, сущна пременка у родней ровноправносци ше може посцигнуц лєм зоз едукованьом од малих ногох. Место же би ше наруцовало думанє же яку улогу треба же би мал хлоп, а яку жена, и у яких одношеньох треба же би жили, дзеци одмалючка треба потримовац же би росли и розвили ше до самостойних, нєетикетованих особох.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 147 раз, нєшка 1)