У силних найновших (р)уских дзелїдбох на кредибилних и дебилних, на „младих котри пребераю” и гевтих искусних, на фестивали и нєфестивали, на проєкти и нєпроєкти, на компетентних и анонимних, на политичарох и нєпослухних гражданох, на националистох-патриотох и козмополитох-зраднїкох, на уметнїкох и естраду, на валалчанох и варощанох, як кед бизме забули на єдно зоз найзачнєйших подзелєньох, котре нас провадзи ище од „атлантиди”, односно присельованя зоз Горнїци до „долнєй жеми”, а то – одредзованє критерийох же хто дилетанти, хто аматере, а хто професионалци.

Нїяк зме нє знали, або нє могли, а найскорей нє сцели, вибориц ше зоз ткв. руску уметнїцку елиту, та чи вона була на ровнї литератури, музики, театралней, або подобовей уметносци. На єдним боку зме нєпреривно скинчали и куїкали над судьбу старей Юґи, над шмелима седемдзешатима, або бановали за фриволнима и шалєнима осемдзешатима роками прешлого вику, док ше коло нас одвивали деґрадативни процеси ткв. ґлобализациї. На другим зме ше боку, под час Милошевича, шицки поцагли до миших дзиркох попрестрашовани од ужасних медийних циґанствох, фалшивих монтажох, спинованьох, автоцензурох и ґебелсовских кампаньох вимиваня мозґох. О политичним плурализме зме ше могли информовац лєм на протестних митинґох котри орґанизовала зраднїцка опозиция, алє и на контраминтинґох дзе виступала, углавним, напредна и нєинфицирована младеж. И на єдних, и на других способох колективного виражованя шалєнства Руснаци свою учасц можу виражиц – у промилох!

Дилетантизма з конца 19. вику, кед започали процеси националних освидомйованьох, през форму снованя рижних културних здруженьох, зме ше после Другей шветовей войни, у чаше електрификациї и индустриялизациї, ментовали досц швидко и нє так боляцо, бо ше, у сущносци, нїкому нє пачела така назва. Було цалком деґутантне дакого наволац же є „дилетант”. Таке дацо подобне як билмез, тутмак, замахайло, тиндир, дурнїло. Людзе котри грали, шпивали, або танцовали по наших културних дружтвох, або ше сходзели на балох и чаянкох, волєли хасновац еуфемизем „активиста”. Конєчно, хто ище у тих часох  перших петолєткох шмел нє буц активни!? Кому же така дурнота и шмела присц на розум!?

Як резултат такей и подобней политики, а з помоцу ентузиястичного руху братства и єдинства, народзела и свойофайтова партийна (комунистична) елита преднякох – РОБОТНЇК У КУЛТУРИ! Дробизґ, розуми ше, и надалєй, шпивал, танцовал, рецитовал, ґлумел у забавох, учел ше грац на тамбурки, або квачел свойо перши новинарски роботи на мурово новини. Гевти кус старши, искуснєйши и, озда, писменши, розумлїво, уж почали ушорйовац билтени, доставац одвичательни задлуженя на роботних акцийох, або читац поздравни бешеди на митинґох з нагоди дочекованя славней Штафети младосци.

Так зме шицки, достали колективну назву – АМАТЕРЕ. Розуми ше, лєм у култури. У других сеґментох вибудови социялизму комунистичного типа, пановали ПРОФЕСИОНАЛЦИ, плацени експерти и фаховци у своїх обласцох.

Културни дїяче, або прецизнєйше, дїяче у култури – мултифункционалци. Розумя ше до шицкого! Надлюдзе! Морално-политично су „подобни” и преверени як орґанизаторе, аниматоре и менаджере. Маю закончени по даскельо политични, театрални и новинарски курси, окончую дзешец до двацец функциї (у зависносци од менталного капацитету) и випишени стоя у перших шорох чежкей, фронтовскей борби за осидомйованє своїх народох и народносцох.

Успих нє могол виостац! Шицки шрубики на своїм месце и инґениозна национална перпертуум мобиле машина може стартовац. До вселени. У медзичаше, у ткв. бази, на жеми, успишно ше окончує друга фаза омасовйованя, процес диференцияциї виволує общу еґзалтацию у народу, а нови управяцки механїзми явно, на городских площох, у фабрикох и на польох викладаю свойо нови Марксово идеї и попатрунки. Нови кадрово пременки подрозумюю и нових аґитпроп комесарох. Аж ше и сам Вельки Вожд зложел зоз тим кед гинто нащивел якешим ловарске здруженє.

Най жию ПРОФЕСИЙНИ АМАТЕРЕ!

Гм! Нєт цо доганяц! Идея одлична, а аналоґия зоз нєшкайшим часом нательо импресивна у свєй поєдноставеносци и примитивизму же би аж могла послужиц як вивозни бренд (меркуй, нє brendy!) до даяких африцких жемох нпр. Буркини Фасо.

Два крочї на лїво, два на право. Два крочаї напредок, два назадок. Дзе ши бул? Нїґдзе. Цо ши робел? Нїч. Важне ше дружиц и „само да будзе весело”!

Лєм ше круциш доокола.

Кока-кола!

Микола до кола!

А на керестурским Ярашу и других националних пажицох „женє баба кози”, як би поведли нашо стари.

(Опатрене 180 раз, нєшка 1)