ЗВЕКШАНИ РУСКИ МАЄТОК

автор И. Сабадош 12. януар 2017

У року за нами, найвецей поробене коло звекшаня руского маєтку и потримовки нашим локалним  штредком. Тераз векши „руски ґрунт” у Керестуре и Новим Садзе. Рок означели и вельки кадрово пременки у руских институцийох.

Национални совит Руснацох предал квартель у Новим Садзе, на Детелинари, а за достати пенєж купени квартель поверхносци 75 квадрати у хижи у улїци Матици сербскей, хторому припада и пиньвица, и подкровє.

ИНСТИТУЦИЇ У СВОЇМ ПРОСТОРЕ

Намира же би до простору хтори тераз власносц Руснацох була змесцена даєдна руска институция, Завод за културу войводянских Руснацох, лєбо НВУ „Руске слово”. По першим планє, у тераз одкупеним квартелю було би нове шедзиско Заводу за културу войводянских Руснацох, а до просторийох дзе нєшка Завод за културу прейдзе редакция НВУ „Руске слово”, хтора иншак и власнїк того квартеля у Футожскей улїци, насампредз же „Руске слово” од влонї у будинку „Дневнику” плаци звекшану квартелїну, цо вельки прицисок на буджет Установи. Будинок на атрактивней адреси, у старим штредзиску Нового Саду, нєобходне адаптовац. Тераз ше глєда архитектонске ришенє, а плановане же би ше финансийну потримовку за адаптацию питало од Покраїни хтора и соснователь Заводу. Моцни арґумент же на конкурсох тей файти предносц кед тот хто конкурує и власнїк нєрухомосци хтору ше адаптує.

Попри тим, Национални совит у Коцуре под длугорочну квартелїну вжал хижу обок при Доме култури дзе будзе Руски дом у тим месце. Окрем спомнутих маєтно-просторних проєктох хтори значни пре терашньосц и будучносц, конєчно реализована и вецейдеценийна задумка хтора ше одноши на нашу прешлосц. Национални совит Руснацох за коло 109 тисячи динари зоз наменских средствох купел найстаршу руску хижу у Руским Керестуре на Вельким шоре так же тот памятнїк на нашо приселєнє тераз власносц цалей заєднїци. Тот историйни памятнїк значни за Руснацох уж под защиту держави. У сотруднїцтве зоз Заводом за защиту памятнїкох Войводини, а по конкурсох на уровню Покраїни и Републики тераз на шоре роботи коло єй защити.

На инициятиву з терену, односно од особох хтори активни у рускей заєднїци у Сриме, Национални совит купел „фолсваґенову” комби превозку за потреби Руснацох у Сриме, найвецей за превоженє дзецох з руских местох у шидскей општини на рижни образовни и културни активносци. Тиж потримани подобни проєкт Руского културного центру з Нового Саду о привоженю дзецох-фолклорашох на проби до Центру, за цо виєднана превозка.

ПРЕМЕНКИ

На общих парламентарних виберанкох у 2016. року, после 15 рокох пременєла ше власц у АП Войводини. После Демократскей странки, тераз прешвечлїву векшину ма Сербска напредна странка. Подїя значна, понеже АП Войводина ключни партнер у процесу сполньованя културней автономиї меншинских заєднїцох, а добри сиґнал же положенє и статус меншинских заєднїцох останю исти, а запровадзени модели финансийней потримовки затераз нє пременєни.

За Покраїнску владу питаня очуваня идентитету и унапредзеня положеня националних меншинох у Войводини, оставаю приоритет у политики, а кед слово о финансийней потримовки националним совитом меншинох у Войводини, мож обчековац же финансованє будзе врацене на дакедишнї, висши уровень.

У 2016. року на чолє двох з трох институцийох чий снователь, лєбо соснователь Национални совит Руснацох, случели ше кадрово пременки, та тераз на чолє Заводу за културу войводянских Руснацох и Руского народного театра „Петро Ризнич Дядя” маме окончовательох длужносци директора. Дочасово кадрово ришеня обезпечели континуитет роботи Заводу и Театра, а у 2017. року по порядней конкурсней процедури достаню руководительох у полним капацитету. Завод за културу войводянских Руснацох зоз потримовку Фондациї за отворене дружтво у 2016. року розпочал интеркултурални проєкт „Карпатски паралели” у хторим млади з румунскей, рускей, словацкей и сербскей заєднїци спатраю значенє бароку, як важного фундаменту модерней интеркултуралносци заєднїцкей историї. За тот проєкт достати 1, 2 милиони динари, цо найвекши поєдинєчни прилїв по основи цивилного проєкту потераз.

ПОГЛАВЯ

У рамикох прегваркох о ступаню до членства Европскей униї, Република Сербия штредком 2016. року отворела Поглавя 23 и 24 у хторих ше дефиную обласци правосудства и фундаменталних правох, односно правди, шлєбоди и безпечносци гражданох. Меншински права обрабя ше у тих поглавйох. Гоч по Акцийним плану, хтори прегваряцка платформа Сербиї у тим процесу, констатоване очуванє здобутого уровня меншинских правох, значне же Уния по заключенє прегваркох провадзи їх примену у пракси, односно чи права наисце функционую. Спомнути поглавя звичайно ше остатнї завера пред тим як держава кандидат ступи до ЕУ.

(Опатрене 146 раз, нєшка 1)