Заєднїцка одвичательносц

автор иван сабадош 26. фебруар 2018

Нєполни мешац и пол остал по початок ювилейного, 50. Драмского мемориялу Петра Ризнича Дядї, над хторим ше зависа ма дзвигнуц 16. марца у Доме култури у Руским Керестуре, а будзе спущена 25. марца. Велька рочнїца, яку нє маю анї велї векши и лєпше орґанизовани заєднїци як наша, вимага и вельку осторожносц и одвичательносц. Єдноставно, з фестивалом хтори през децениї постал символ драмскей творчосци при Руснацох, нє шме ше шалїц. Добре же свидомосц о тим, та и одвичательносц, нє остала лєм на орґанизаторох, алє их прилапели и дзеля их и шицки водзаци актере у културним и националним живоце рускей заєднїци.

Кед ше дума на Мемориял, звичайно перша асоцияция його вечарши представи за старшу публику. Медзитим, на тим особнєйшим, емоцийним уровню глїбши и моцнєйши оцисок и шлїд охабяю дзецински представи хтори ше даваю коло поладня. Можлїве же велї з вас и нєшка паметаце даяку сличку, особу лєбо сонґ зоз „забави” патреней пред даскельо децениями, док розограта сала ище пахла на преробени олєй а на бини стала хмара диму, нє од сценских ефектох алє курячох зоз перших шорох…

Национални совит, односно його Одбор за културу, влонї розпочал систематично обдуману акцию за предупредзованє кризи у нашей драмскей творчосци наменєней наймладшей публики. На два заводи, влєце и влонї, розписовани конкурс за финансованє дзецинскей представи хтора будзе бавена и на Мемориялу. Буджет конкурса нє вельки, алє вшелїяк же ше и так допоможе, голєм же би ентузиясти хтори ище вше витирвую у тей красней роботи, нє були на трошку. Новосц и же барз преширене право хто може конкуровац – конкурс наменєни дружтвом, секцийом, школом, та и поєдинцом хтори пририхтую представи за дзеци. Чи то пре тот конкурс чи нє, алє тих дньох по наших местох навелько ше роби и мож обчековац же дзецински репертоар тогорочного Мемориялу будзе обезпечени. Нє треба забуц же през представи за дзеци нє лєм же вирастаю нашо будуци „прави” ґлумци, алє ше култивує и будуцу театралну публику пре хтору, на концу, и основани и по нєшка тирва Мемориял.

(Опатрене 63 раз, нєшка 1)