Керестурски школяре и Цифричова з транспрту треци у держави

автор маф
910 Опатрене

БЕОҐРАД – Представителє заходнобачкого округу, векшином школяре Основней школи (ОШ) „Петро Кузмяк” з Руского Керестура, як екипа достали погар за завжате треце место од 27 округох на Републичним змаганю „Цо знаш о транспорту” зоз предмету Технїки и технолоґиї. Поєдинєчно, Леонела Цифрич у своєй катеґориї тиж завжала треце место.

Попри Цифричовей, школярки керестурскей Школи хтора ше змагала у Ц катеґориї, за школярох од 13 до 15 рокох, у екипи заходнобачкого округу були и Константин Ничетин з ОШ „Иса Баїч” зоз Кули, а у Б катеґориї – школяре од 10 по 12 роки змагали ше керестурски школяре Хелена Новта и Иван Рац.

Поєдинєчно, попри Цифричовей, шицки посцигли добри пласман, та Ничетин подзелєл штварте место, Новтова була шеста, а Рац єденасти. У каждей катеґориї окреме хлапци, окреме дзивчата, було од 23 по 26 змагательох. За змаганя их пририхтовали наставнїки керестурскей Школи Зденко Шомодї и кулскей Михайло Шанта.

На змаганю участвовали вецей як сто школяре, а отримане є 25. и 26. мая у Беоґрадзе, у Дому школярох Штреднєй желєзнїцкей школи и у гали „Пионир”. По двойо першопласовани у Б катеґориї пойду на европске першенство у септембру до Будимпешти.

ПОВЯЗАНИ ТЕКСТИ