Лєм ґурац напредок

автор цецилия надь 7. авґуст 2017

Прешлого викенду отримана журка „Pact On” на керестурским базену, у орґанизациї Здруженя гражданох „Pact Ruthenorum”, дзе главни члени – млади особи. Под отвореним нєбом, обидва вечари були нащивени зоз младежу хтора жадна розваги, музики, опущеней атмосфери и друженя зоз парняками. Ґрупи хтори були задлужени за добри „штимунґ” сполнєли свой задаток.

Под тим меном, тото лєтнє збуванє орґанизоване по треци раз, a пред тим, розвагу младим тримала „Водова фест”. Фестивал хтори за Керестур бул як „мини Еґзит” бул познати и ширше, нє лєм при Руснацох и людзох зоз околїска. Звичайно були даскельо „стейджи”, т. є. бини, єдна главна и даскельо менши, а шицки зоз розличнима файтами музики. Нєшка, на журки „Pact On” єст лєм єдна бина и на нєй ше зменюю шицки учашнїки-музичаре; єст лєм єден шанк и єдна, менша локация дзе ше отримує тота журка. Кед ше поровна зоз „Водову фест”, мож замерковац же журка „Pact On” скромнєйшого характеру.

Алє, нє треба подценьовац. Гоч збуванє ма меншу и скромнєйшу ноту, важне же ше колєсо обраца, же ше цошка случує. Можебуц нє шицки млади, алє найвитирвалши поєдинци ше намагаю и указаю добру дзеку за порушованьом. Кед нє мож на велько, у шоре, обдума ше менше, алє ше нє одустанє и то тота главна водзаца нїтка.

Младих дакеди треба лєм поґурац, дац им тот витор до хрибта, та ше визнача и зоз фестивалами, друженями, у школованю, зоз гобиями.  Вшелїяк же потребне допатрац дружтвени живот, и вредзи укладац до ньго, бо млади зажадани друженьох, цо прешлого викенду було видно и по велькей нащивеносци.

Гваря же критика конструктивна, алє похвалу ше памета, цеши ше зоз ню и вона тот перши крочай и подпора за далєй.

Пишце нам – ruske.redaktor@gmail.com

(Опатрене 128 раз, нєшка 1)