Маджуни предаваю он-лайн

автор влдї 17. авґуст 2018

Єст уж коло пол рока як ше Здруженє женох „Бикичанки” з Бикичу учленєло до Желєней мрежи Войводини, у чиїх рамикох иснує и Желєна рурална мрежа. Слово о проєкту хтори задумани так же би економски змоцньовал жени на валалє.

Єден сеґмент економского змоцньованя женох у Бикичу то и продукованє и предаванє продуктох з хторих жени маю заробок. Перши крочаї того лєта витворели и даскельо жени членїци бикичского Здруженя женох.

Иницияторка нових сучасних крочайох Невенка Бобаль, предсидателька „Бикичанкох” хтора наварела маджун и предава го он-лайн, односно прейґ интернет дутяна.

РЕЦЕПТ ДАКЕДИШНЇ

– Потераз то лєм перши крочаї и увидзиме чи таки способ предаваня зажиє. Наварела сом маджуну з брескиньох, кайсох, белавих шлївкох и ягодох. Маджун у фляшкох од 850 ґрами и менши од 400 ґрами. Налїпена и етикета з основнима податками о яким ше маджуну роби, кеди є уварени и наведзене количество. Ище два-три нашо жени тиж наварели одредзене количество маджуну за предай и увидзиме як руши предаванє – гварела нам Невенка Бобаль и указала маджуни хтори наварела.

Наша собешеднїца додала же так годни предавац лєм жени хтори членїци Здруженя женох, бо прейґ нього поставаю и членїци Желєней мрежи Войводини.

Вона надпомла и же маджуни наварени зоз овоцох хтори сами продукую на своїм ґаздовстве. Рецепт дакедишнї – же би було цо природнєйпше, ту лєм овоц, цукер и найменше количество конзерванса, же би ше маджун добре зачувало.

Цо ше дотика ценох, вони прилаплїви: за фляшку од 850 ґрами 200 динари, як и за маджун з брескиньох и шлївкох, 300 динари з кайсох и 400 динари за маджун з ягодох.

ПОНУКАНЄ И ПРЕЙҐ ФЕЙСБУКА

З оглядом же анї Здруженє, анї Месна заєднїца нє маю свой сайт, маджун понукаю прейґ фейсбука. Кед дахто зацикавени поручиц маджун, годно го випоручиц на жадану адресу прейґ курирскей служби, а тиж и особнє – кед дахто преходзи през Бикич годзен присц до обисца и купиц маджун.

На таки способ предаваня годно попредац и други продукти як цо соки, компоти, сладке, домашнї резанки, сухи месово продукти и шицко тото цо домашня и здрава пожива.

– Потераз сом почала правиц маджун, а кед ше будзе добре предавац, можлїве же продукцию преширим и на соки, або компоти. Шицко тото сами продукуєме, а Бикич познати по продукциї овоци хтору ше и вивожи.

Плануєме у валалє розвивац и валалски туризем, та и то би бул нови способ предаваня наших продуктох – виприповедала Невенка Бобаль.

НАШО ЛЮДЗЕ ШЕ ПРИСПОДОБЮЮ

У тих кризних часох, обачлївей безпенєжносци и нєзанятосци, вше частейше видзиме и приватни инициятиви самостойней продукциї поєдинцох, лєбо у рамикох здруженьох.

Людзе ше знаходза як знаю и можу же би обезпечели основни потреби, алє и же би то було, кельо можлїве, на цо природнєйши способ. Так ше, наприклад, правело соки, маджуни и компоти зоз домашнєй загради за себе, а вец ше звишок давало и предавало сушедом, на улїци, алє вец и старши почали и прейґ интернета, он-лайн и дружтвених мрежох.

Так, за релатино мали пенєж мож купиц продукти задоволююцого квалитету, алє вше то найлєпше кед од дакого познатого.

(Опатрене 91 раз, нєшка 1)