Медзинародни саям кнїжкох,  „Арт Експо” и „Драгокази” од 7. по 12. марец

автор вев
831 Опатрене

НОВИ САД – На Новосадским сайме од 7. по 12. марец будзе отримани Медзинародни саям кнїжкох, Вистава уметносцох „Арт Експо” и Саям образованя „Драгокази”.

На конференциї за новинарох отриманей вчера у Шветочним салону на Новосадским сайму, вивершни директор за саямску дїялносц Борис Надлукач наявел же на Медзинародним сайме кнїжкох, Вистави уметносцох „Арт Експо” и Саяме образованя „Драгокази” буду участвовац вецей як 150 викладаче зоз Сербиї и 7 жемох з реґиону.

Саям образованя „Драгокази” почнє 8. марца, а Покраїнски секретарият за образованє, предписаня, управу и национални меншини-национални заєднїци и того року обезпечел средства за орґанизовани приход школярох зоз 71 штреднєй школи з териториї Войводини до Нового Саду на Саям. По словох секретара Михаля Нїлаша, окремни акцент того року на модерним образованю, на нових виволаньох у обласци информатики и диґитализациї.

Универзитет у Новим Садзе представи шицки 14 факултети и 3 науково виглєдовацки институти, хтори ше находза у штирох универзитетских городох у Войводини. Ректор Универзитета у Новим Садзе др Душан Николич гварел же на Сайме образованя буду презентовани нє лєм вецей як 400 студийни програми, алє и шицко цо подрозумює академски живот, як и провадзаци служби – змесценє у студентских домох и здравствену защиту.

Предсидатель Орґанизацийного одбору Сайма кнїжкох, Зоран Дєрич наявел же пре вименку у концепциї, понеже Салон постал Саям, програмски цалосци буду атрактивнєйши и популарнєйши ширшей публики. Награда „Лаза Костич” и того року ма два часци, и будзе додзелєна за литературу за одроснутих и за кнїжку за дзеци.

Новинско-видавательна установа „Руске слово”, вєдно зоз Заводом за културу войводянских Руснацох, представи свойо виданя на штварток, 8. марца од 15 годзин, у рамикох програми Покраїнского секретарията за културу, явне информованє и одношеня з вирскима заєднїцами и Покраїнского секретарията за образованє, предписаня, управу и национални меншини-национални заєднїци.

Медзинародни саям кнїжкох и 23. Вистава уметносцох „Арт Експо” буду тирвац од 7. по 12. марец, а 13. Саям образованя „Драгокази” од 8. по 10 марец, а 9. марца, отримани и Саям обезпечованя роботи. Уход на шицки програми безплатни, а Новосадски саям роби кажди дзень од 10 до 19 годзин.

ПОВЯЗАНИ ТЕКСТИ