Милошевич: Култура и язик слупи очуваня шицких идентитетох у Войводини

автор ядю, фото апв
944 Опатрене

НОВИ САД – Вчера у Скупштини Войводини почала дводньова Медзинародна конференция „Язик – култура – идентитет” хтору орґанизує Покраїнски защитнїк гражданох.

Присутних привитала Драґана Милошевич, покраїнска секретарка за културу, явне информованє и одношеня з вирскима заєднїцами и у бешеди наглашела же култура и язик главни слупи очуваня идентитетох шицких националних заєднїцох у Войводини.

– Прето зме снователє вецей институцийох од окремного значеня за културу сербского, алє и нє лєм сербского народу, котрим обезпечуєме стабилне и отримуюце фунционованє. То вшелїяк Сербски народни театер, Музей и Архив Войводини, Музей сучасней уметносци, Завод за културу Войводини, алє и пейц заводи за културу националних меншинох – мадярскей, словацкей, румунскей, рускей и горватскей.

Окрем институцийней, барз важна и потримовка у проєктним софинансованю у култури, та Покраїна у 2017. року потримала вецей як 800 фестивали, смотри и манифестациї, културно-уметнїцки дружтва, городски и општински библиотеки, видавательни и други проєкти од чого коло 270 на язикох скоро шицких меншинох котри жию у Войводини.

Милошевич визначела же кед слово о язику, котри тиж барз важни у очуваню националного идентитету, Покраїна континуовано софинансує явне информованє на меншинских язикох през друкованє 22 дньових, тижньових, младежских и дзецинских часописох на осем язикох чийо снователє национални совити националних меншинох.

– Попри тим, през конкурсне софинансованє зме прешлого року потримали 65 проєкти медийох чийо снователє приватни особи лєбо орґанизациї цивилного сектору на шицких меншинских язикох, и 120 медийски проєкти на сербским язику. Ґу тому треба спомнуц и Радио-телевизию Войводини хтора емитує програму, окрем по сербски, на ище 15 язикох, од котрих дзешец маю свойо окремни редакциї и по тих мерадлох є єдинствена у Европи.

Учашнїкох конференциї, еминентних фаховцох зоз Сербиї и вецей европских жемох, и представнїкох сербскей меншини у Мадярскей, Румуниї и Горватскей, привитали и подпредсидателька Скупштини АП Войводини Снежана Седлар и покраїнски защитнїк гражданох др Зоран Павлович.

12042018_Milosevic, medjunarodna konferencija-4

ПОВЯЗАНИ ТЕКСТИ