Млади ше одволали, старших було мало

автор ядю
743 Опатрене

НОВИ САД – На роботньох котри вчера, 16. децембра, орґанизовал Завод за културу войводянских Руснацох (ВР) млади указали порихтаносц буц проактивни, научиц  як витвориц свойо идеї през писанє проєктох, док на роботнї за старших, котри представяю нашо здруженя цо прейґ проєктох  вимагаю финансийну помоц од наших установох, пришли лєм тройо представнїки.

Як Рутенпрес дознава од директорки Заводу за културу ВР Анамариї Ранкович, на роботню за младих пришли тоти цо потераз ище нє писали проєкти, та тераз научели як треба роздумовац, плановац и писац проєкти. През тоту процедуру заинтересованих водзела Соня Гудак спред БалканИдеї, а дзепоєдни напрямки им дала и директорка Ранкович.

Друга роботня була предвидзена за активистох лєбо занятих у одредзеним културно-уметнїцким дружтве, здруженю, лєбо орґанизациї хтори уж писали проєктни предклади на конкурси Заводу за културу ВР и НС Руснацох. Медзитим, на роботню ше одволали лєм тройо представнїки – з дюрдьовского КУД „Тарас Шевченко”, новосадского Руского културного центру и Дружтва за руски язик, литературу и културу. По словох Танї Арва Планчак, котра през конкретни приклади указала дзе ше найчастейше гриши, визначела же барз важне же би шицки здруженя научели правилно пополньовац формулари и писац проєкти, бо на тот способ годни конкуровац и на други места, и так реализовац вецей активносци, а нє операц ше лєм на буджет Националного совиту Руснацох.

И Ранковичова и Арва Планкачова ше зложели же дружтва лєбо здруженя котрим таки файти роботньох найпотребнєйши нє послали своїх представнїкох, та шлїдуюцого року при розподзельованю средствох дружтва котри ше одволали на роботню, а котри и так найлєпше пишу проєкти и даваю звити о потрошених средствох, достаню додатни боди.

ПОВЯЗАНИ ТЕКСТИ