Награда часописа „Шветлосц” Олени Планчак-Сакач

автор ммц/там
1.1k Опатрене

НОВИ САД – На Дзень НВУ „Руске слово”, пияток, 15. юния, хтори означени того року роботно, директорка НВУ Мартица Тамаш уручела Награду часописа „Шветлосц”  „Микола М. Кочиш” за 2016-2017. рок Олени Планчак-Сакач, редакторки рубрики „Култура и просвита” у новинох „Руске слово” и длугорочней сотруднїци часописа „Шветлосц”.

Одвичательни редактор часописа „Шветлосц” Микола М. Цап у обгрунтованю Награди гварел:

– Олена Планчак-Сакач пише литературну критику, поезию и прозу, а замеркована є и як прекладатель зоз сербского и словенского язика. Свойо тексти обявйовала у „Руским слове”, „Шветлосци”, „Литературним слове”, „Новей думки”, „Дневнику”, „Траґу”, „Studia Ruthenici”, „Свитку” и у словенским е-часопису „Provinca”. Обявела кнїжку литературних критикох „Шитко” (2016).

Награду ше додзелює Олени Планчак-Сакач за серию прилогох литературно-критичного характеру, котри вона у тим часопису обявює уж скоро дзешец роки.

 Прилоги у часопису „Шветлосц”, за котри ше ю наградзує з Награду „Микола М. Кочиш”, представяю значне и ориґиналне доприношенє нє лєм литературней критики на руским язику, алє и рускей литератури вообще – гварел Микола М. Цап.

– Награда часописа „Шветлосц”, котра ноши мено нашого визначного линґвисти, поети и писателя Миколи М. Кочиша, додзелює ше раз у двох рокох (спочатку то була рочна награда), а перши єй ношитель бул Микола Скубан, котри тоту награду достал давного 1972. року. Остатнї добитнїк тей награди бул др Яков Кишюгас, котри ю достал за тематични блок „Стратеґиї воспитаня”, за период 2014-2015. рок.Тераз ше ґу тому списку приключує и Олена Планчак-Сакач, на цо єй Редакция и колектив винчую и жадаю вельо успиху у будуцим творчим анґажману на афирмованю рускей литератури и власному доприношеню єй дальшому росту у шицких сеґментох – визначел Микола М. Цап.    

ПОВЯЗАНИ ТЕКСТИ