РУСКИ КЕРЕСТУР – Здруженє паприґарох „Капсикум анум” з Руского Керестура штварток, 27. априла, на позарядовей схадзки векшини своїх членох оформело єдинствену цену за наднїчарох пред наиходзацим пресадзованьом паприґи, а спатраюци ше на други места, як цо то Деспотово, Ґосподїнци, Вайска и други.
На схадзки посцигнута догварка же минимална наднїца будзе 1 400 динари за осем годзини роботи, плус трошки за превоз (у зависносци од места биваня наднїчара) и за бриґадирох, по догварки з ґаздом.
Попри о наднїци, паприґаром винєшени и информациї о субвенцийох и стимулацийох од державних орґанох за системи за наводньованє, купованє нових тракторох и другей механїзациї, о чим присутним бешедовал член Управного одбору Здруженя Владимир Варґа, а предсидателька Здруженя Душица Орос бешедовала о можлївосцох осиґураня шацох на польох, як и предносцох колективного осиґураня прей Здруженя.
