Наша сотруднїца – Цецилия Надь

автор МАК 22. май 2017

Цецилия Надь з Руского Керестура почала сотрудзовац з МАК-ом ище у штреднєй школи. У нашим часопису перше єй була обявена поезия, та ше так, ище 2009. року, єй твори нашли и у МАК-овей кнїжки „Дебитанти” – поезия осем авторох.

Познєйше почала писац и новинарски тексти, та так Цеца, наша новинарка, длугорочна гонорарна сотруднїца, уж сиґурно вецей як пейц роки поряднє пише за кажде число МАК-у.

Як вонкашня сотруднїца редакторки, Цецова обовязка, уж пияти рок, тиж так и глєданє нових сотруднїкох за кажде число, лєбо комуникованє з поряднима сотруднїками, а потим и виправянє їх текстох, порада з нїма после як МАК видзе, и подобне. Так же, кед и ви сцеце участвовац у креированю нашого часопису, можеце ше явиц и Цеци.

Фото: Ясмина Максич

Фото: Ясмина Максич

Иншак, Цецилия закончела керестурску Ґимназию „Петро Кузмяк”, а вец и Одсек за медийски студиї на Филозофским факултету у Новим Садзе. Тераз закончує мастер студиї на новосадским Факултету технїчних наукох, на Департману за инженєрски менаджмент, на модулу – Индустрийни маркетинґ и инженєрство медийох.

Найволї робиц интервюи, бо, як гвари, так вше упознава нови особи, хтори ю инспирую.

Окрем того же є наша сотруднїца, Цецилия тиж так ушорює и пише за рубрику „Мозаїк” у новинох Руске слово, а ма искуства и у онлайн маркетинґу.

pictures 010_1600x1065

Пред точно двома роками, 2015. року, Цецова поезия обявена и у єй кнїжки „Чаривни нїтки”, точнєйше, у двокнїжки поезиї „Чаривни нїтки”/„З молу до дуру”, у хторей обявена и поезия Михаила Рамача з Дюрдьова. Тоту їх двокнїжку видал МАК, односно НВУ „Руске слово”, як 18. кнїжку у едициї МАКoff.

Фото: Михаил Рамач

Фото: Михаил Рамач

Окрем на промоцийох, Цеца свою поезию вецей раз представяла и на „Дньовки”, на даскелїх програмох у Руским културним центру, як и на „Костельниковей єшенї”.

j

Кед МАК и „Пакт Рутенорум” 2008. року мали заєднїцки штанд на Еґзиту, Цеца и терашня редакторка часопису, Мая, участвовали у мено Пакту, а нащивел их и терашнї ґрафични дизайнер МАК-у, Злайо (цо призначене и на тей фотки), гоч теди ище нїхто з нїх нє мал вязи з МАК-ом. Випатра же було судзене… :)

(Опатрене 295 раз, нєшка 1)