Нашо гвиздочки: Николина Миячич

автор фес 20. април 2018

Школярка є седмей класи ОШ „Йован Йованович” у Сримскей Каменїци,и то одлична. Однєдавна тренира теквондо и уж положела за жовти пас, а цо найважнєйше, нє врацела ше анї з єдного змаганя без медалї!

Николина за тот спорт чула цалком случайно, од приятельки и пред седем мешацами почала ходзиц на тренинґи. Тренере такой обачели же є схопна, швидко „упива” шицко цо єй поведза, и упарта. Нє чежко єй з Каменїци шеднуц на автобус, гоч вонка плющи и вшадзи цма, и пойсц на тренинґ до школи „Иво Лола Рибар” у Новим Садзе дзе тренира єй клуб.  Гоч ма досц обовязки у школи, приватни годзини з анґлийского, нємецкого, тренинґи нїґда нє прескакує. Озда прето зазначує таки красни успихи, а за барз кратки час. Лєм после двох мешацох тренираня, врацела ше зоз Старей Моравици (Войводина опен) з двома стрибернима медалями коло шиї. Першу достала за борбу, а другу за форми, дзе указала як ше зна биц з ногами, а як з руками, як ше зна руцац и обрацац… А вец, о мешац отримане державне першенство у Лозници, вельо моцнєйше у конкуренциї як у Моравици, алє и отамаль ше нє врацела з празнима руками. З борбох принєсла бронзу, а зоз формох стрибло. Бул то одлични успих младей теквондисткинї.

Того року у фебруару у Суботици отримане вельке змаганє (Сербия опен)  на хторим участвовали и змагательки и змагателє з вецей жемох України, Мадярскей, Болгарскей, Словениї… Гоч з борбох нє освоєла медалю, Николина у формох три змагательки победзела, и освоєла стрибло.

Миячичова гвари же теквондо борецка схопносц хтора служи у самоохрани, нє насилни є спорт, правила ше муши почитовац, и ма якуш свою рутину. Прето ше єй и пачи. Подзелєни є до вецей катеґорийох, Николина тренира ИТФ, цо значи же ше може биц и з ногами и з руками, ту иншаки паси, опрема.., як наприклад у ВТФ катеґориї дзе нє мож у борбох хасновац руки. Праве ту ше преславела позната спортисткиня Милица Мандич, пре хтору нєшка тот спорт вельо познатши и розвитши у нашей жеми.

На початку юния ознова будзе змаганє за паси, а вец и борби за хтори ше Николина од тераз рихта. Будземе єй сцискац песци, а о медальох и дипломох вас на час поинформуєме.

IMG-496fa96f4c89142952ed38961e560426-V

(Опатрене 208 раз, нєшка 1)