На Медзинародним кампу „Чловек – швет” и Руснаци

автор маф
922 Опатрене

ЧАРДАК (КОВИН) – Медзинародни камп „Чловек – швет” за штредньошколцох отримани од 16. по 23. юлий у Школско-рекреативним центре Делиблатскей Писковини – Чардак (при Ковину).

Тото християнске стретнуце позберало 300 младих штредньошколцох, з рижних местох Сербиї, а найвецей з Войводини, медзи хторима було и 15 Керестурцох и тройо з Коцура, а першираз була и векша ґрупа младих православней вири з Беоґраду и Войводини.

На Кампу участвовали и млади зоз 14 жемох, углавним з Европи, алє и з Арґентини, Параґваю и Алжиру.

Камп мал богату програму и активносци през хтори млади мали нагоду сотрудзовац, упознац и свойо култури и традициї, литурґийну праксу, а понад шицко витвориц приятельства. Cardak5

Учашнїки кампа мали и даскельо вилєти – до Беоґраду, нащивели Заєднїцу „Жем живих” при Новим Садзе, єдну православну парохию у Туриї при Беоґраду, а мали и роботну акцию ушорйованя городского парку у Ковину.

На площи у Ковину, у сотруднїцтве з Центром за културу, орґанизовани два концертни вечари на хторих ше учашнїки Кампу представели з културно-уметнїцку програму. Руснаци наступели зоз фолклорну точку – дзивоцким танцом „Хоровод”, а бул и штанд з череґами и колачами на квасу.

Камп нащивел и апостолски нунций у Сербиї монс. Лучияно Сурияни, архиепископ Станислав Хочевар, представитель Канцелариї за сотруднїцтво з церквами Министерства правди Републики Сербиї пан Ґаврило Ґрбан. Тота Канцелария, як и Беоґрадске надвладичество, и финансийно потримали Камп, а потримала го и Општина Ковин. Камп достал благослов и од Святого Архиєрейского Синоду Сербскей Православней Церкви.

Cardak6

ПОВЯЗАНИ ТЕКСТИ