На Сайме у Беоґрадзе и три нови руски кнїжки, представянє на штварток

автор шан
1.2k Опатрене

БЕОҐРАД – На тогорочним Шейдзешат другим Медзинародним сайме кнїжкох у Беоґрадзе, хтори почина на нєдзелю, 22. октобра, а тирва по 29. октобер, НВУ „Руске слово” ше представи з трома новима, як и трома кнїжками з прешлорочней продукциї.

Широкей публики буду представени кнїжка поезиї „Дармоєди” Сашу Сабадоша, роман за младих „Инисур – рика княза” Себастияна Нярадия и кнїжка студийох, есейох, розправох „Складанє идентитетох” академика Юлияна Тамаша.

Попри тих кнїжкох хтори з друку вишли праве пред Саймом, „Руске” представи и кнїжки з лоньскей продукциї, а хтори нє були презентовани на прешлорочним Сайме. То кнїжка критикох „Шитко” Олени Планчак Сакач, сликовнїца „Челядз дринкова” Михайла Ковача и штварти том позбераних творох Гавриїла Костельника „Роса и слунко”.

Кнїжки Руского слова на Сайме нєпреривно буду виложени на штанду Покраїнского секретарията за културу, явне информованє и одношеня з вирскима заєднїцами, а промоция наших кнїжкох и двох числох часопису „Шветлосц” будзе на штварток, 26. октобра, у Гали „Александар Вучо” на 11 годзин.

Обчекує ше же штанд „Руского слова” исти дзень нащивя и школяре з Руского Керестура, за хторих пририхтани мали перформанс у хторим буду участвовац авторе-писателє и школяре.

До конца рока „Руске слово” би мало обявиц ище три кнїжки по руски – кнїжку сообщеньох, оглядох и статьох „Руснаци” Дюру Латяка, кнїжку поезиї Владимира Ґарянского и Руски християнски календар за 2018. рок.

ПОВЯЗАНИ ТЕКСТИ