На локалних виберанкох победзела СНС

автор мар
748 Опатрене

РУСКИ КЕРЕСТУР/КУЛА − Локални виберанки у општини Кула були отримани вчера, 16. децембра, по перших нєурядових резултатох, у цалей општини зазначена виходносц од 49,69 одсто, а победзела и до тераз владаюца коалиция Сербскей напредней странки и Союзу войводянских Мадярох „АЛЕКСАНДАР ВУЧИЧ – ПРЕТО ЖЕ ЛЮБИМЕ КУЛУ” зоз 59,55 одсто.

У Руским Керестуре право гласц мали 3 933 гражданє, а гласали 1 608, цо 40,88 одсто. Лїстина „АЛЕКСАНДАР ВУЧИЧ – ПРЕТО ЖЕ ЛЮБИМЕ КУЛУ” освоєла найвецей, 1 005 гласи, цо виноши 66,24 одсто, потим лїстина „СОЦИЯЛИСТИЧНА ПАРТИЯ СЕРБИЇ – ИВИЦА ДАЧИЧ” 177 гласи, односно 11,66 одсто.

Лїстина „ҐРУПА ГРАЖДАНОХ КРИТИЧНА МАСА” у Руским Керестуре освоєла 146 гласи, цо 9,62 одсто, потим шлїдзи лїстина „РУХ ЗА ОБНОВУ КРАЛЬОВИНИ СЕРБИЇ – МАРКО КОШУТИЧ” з 74 гласами, односно 4,87 осто.

„РУХ СОЦИЯЛИСТОХ – АЛЕКСАНДАР ВУЛИН” у валалє освоєл 45 гласи, цо виноши 2,96 одсто, а „ПАРТИЯ ЗЄДИНЄНИХ ПЕНЗИОНЕРОХ – МИЛАН КРКОБАБИЧ – И КУЛА СЕРБИЯ” достала 43 гласи, односно 2,83 одсто од вупного числа.

Лїстина „РУСИЙСКА СТРАНКА – ДУШАН ГАЙДУКОВИЧ – КЕКОВО ПРИНЦИПИ” освоєла 1,45 одсто зоз 22-ома гласами, а найменєй достала „СЕРБСКА РАДИКАЛНА СТРАНКА – ДР ВОЇСЛАВ ШЕШЕЛЬ”, лєм пейц гласи, цо 0,32 одсто у Руским Керестуре.

На штирох виберацких − 34. у Ловарским доме „Ярабица”, 35. у Доме борцох и пензионерох, 36. у ЯКП „Руском” и 37. у школским Замку, було вкупно аж 91 нєважаци лїстки, алє цали виберанкови дзень прешол без нєправилносцох и инцидентох.

Вкупни резултати у цалей општини ше од рускокерестурских розликую у ниянсох, лїстина под числом 1 „АЛЕКСАНДАР ВУЧИЧ – ПРЕТО ЖЕ ЛЮБИМЕ КУЛУ” освоєла 59,55 одсто, лїстина число 2 „СОЦИЯЛИСТИЧНА ПАРТИЯ СЕРБИЇ – ИВИЦА ДАЧИЧ” достала 11,19 одсто, а лїстина число 3 „РУХ ЗА ОБНОВУ КРАЛЬОВИНИ СЕРБИЇ – МАРКО КОШУТИЧ” 6,73 одсто.

Лїстина число 4 „РУСИЙСКА СТРАНКА – ДУШАН ГАЙДУКОВИЧ – КЕКОВО ПРИНЦИПИ” ма 2,17 одсто, число 5 „РУХ СОЦИЯЛИСТОХ – АЛЕКСАНДАР ВУЛИН” 3,88 одсто, а шеста по шоре на гласацким лїстку „СЕРБСКА РАДИКАЛНА СТРАНКА – ДР ВОЇСЛАВ ШЕШЕЛЬ” освоєла 1,66 одсто.

Седма була преглашена лїстина „ПАРТИЯ ЗЄДИНЄНИХ ПЕНЗИОНЕРОХ – МИЛАН КРКОБАБИЧ – И КУЛА СЕРБИЯ” вкупно достала довириє 2,01одсто гласачох, а осма лїстина „ҐРУПА ГРАЖДАНОХ КРИТИЧНА МАСА” 9,13 одсто.

Спатраюци тоти нєурядово резултати, локални парламент од 37 одборнїкох буду твориц найвироятнєйше 26-еро з першей коалицийней лїстини СНС и СВМ, штверо зоз СПС, штверо ҐГ „Критична маса” и тройо зоз РОКС-у, а по шицким же други штири лїстини нє освоєли достаточне число гласох за цензус.

ПОВЯЗАНИ ТЕКСТИ