На штварок будзе представена видавательна творчосц по руски

автор ядю
755 Опатрене

НОВИ САД – На Новосадским сайме од 7. по 12. марец, будзе отримани Медзинародни саям кнїжкох, на котрим ше на штварток, 8. марца на 14,30 годзин, зоз своїма виданями ширшей явносци представи Новинско-видавательна установа (НВУ) „Руске слово” и Завод за културу войводянских Руснацох (ВР) у гали „Мастер”.

На покраїнским штанду НВУ „Руске слово” представи свойо нови виданя: кнїжку вибраних сообщеньох и оглядох Дюри Латяка „Руснаци”, перши том, кнїжку вибраних студийох и есейох з русинистики и українистики академика Юлина Тамаша „Складанє идентитетох”, кнїжку вибраних писньох Владимира Ґарянского „Конь зоз чудесней ноци”, фантастично роман за младих „Инисур – рика княза” Себастияна Нярадия, кнїжку поезиї „Дармоєди” Саши Сабадоша, Руски християнски календар 2018 („Руске слово” го обявює вєдно зоз редакцию Християнского часопису „Дзвони”), кнїжку руских народних писньох за дзеци „Когуцик ярабик” (виданє Часописа за дзеци „Заградка” и кнїжку Александри Живкович ЛЮСПП („Любов, секс, политични партиї”), роман у приповедкох з елементами сучасного рускоанґлосербского бешедного язика младих, у виданю младежского часопису МАК.

Завод за културу ВР Моноґрафию „Руснаци у Суботици“, Зборнїк роботох зоз науковей конференциї отриманей 2016. року, мастер роботу „Литературно-историйни дискурс драмского додатку часописа ’Шветлосц’ у периодзе од 1952. року по 2010. рок” хтора видата у Едициї иновацийох „Ґарянски” и найновше виданє – Словнїк руского народного язика.

Окрем Медзинародного сайма кнїжкох, у тим терминє отримує ше и Вистава уметносцох „Арт Експо” и Саям образованя „Драгокази”, на хторих участвую вецей як 150 викладаче зоз Сербиї и 7 жемох з реґиону. Уход на шицки програми безплатни, а Новосадски саям роби кажди дзень од 10 до 19 годзин.

ПОВЯЗАНИ ТЕКСТИ