На ютре почина Медзинародни польопривредни саям

автор днв/мар
976 Опатрене

НОВИ САД – Найвекша саямска манифестация у нашей жеми и єдна з найзначнєйших з обласци аґрару – Медзинародни польопривредни саям – на Новосадским сайме почина на ютре, 13., а тирва по 19. май. На Сайме ше представя коло 1 500 викладаче зоз 60 державох, а тогорочна жем-партнер Босна и Герцеґовина.

Окрем викладачох зоз Сербиї и жеми-партнера, на Новосадским сайме буду и викладаче з Австриї, Албаниї, Белґиї, Болгарскей, Чарней Гори, Ческей, Греческей, Французкей, Голандиї, Горватскей, Италиї, Израїлу, Китаю, Летониї, Мадярскей, Македониї, Нємецкей, Польскей, Румуниї, Словениї, Шпаниї, Турскей, України, як и Зєдинєних Арабских Емиратох, а дзешец жеми свою привреду представя на колективних виставох.

Як гварел ґенерални директор Новосадского сайму Слободан Цветкович, 84. Медзинародни польопривредни саям укаже прегляд актуалного стану у польопривреди, а источашнє є и место за промованє технолоґийних иновацийох и новитетох польопривредней механїзациї, алє и шицких обласцох аґрару. З потримовку Министерства польопривреди и защити животного штредку будзе орґанизована Национална вистава статку, як и вистави продуктох з ознаку ґеоґрафского походзеня и орґанскей продукциї.

4-Sajam-02

Под час Сайму будзе порушана и инициятива за орґанизованє берзи статку на Новосадским сайме, цо у Сербиї нє постої, та тарґованє зоз статком нєконтроловане.

Польопривреднїки на тей манифестациї годни поднєсц и вимогу за купованє нового трактора, моцносци до 100 киловати, а интересованє за тоту поволанку, обявену початком априла, барз вельке.

Як кажди рок, буду отримани дїловни и фахово стретнуца, преподаваня и презентациї.

Нащивителє Медзинародного польопривредного сайму и того року буду мац нагоду достац даєден дарунок хтори пририхтани у сотруднїцтве з викладачами, а главна награда за нащивительох трактор беларус 82,1”, хтори кошта 20 500 еври и дарує гоАґропанонка.

Капури Новосадкого сайму буду отворени од 9 до 19 г., а цена уходнїци 600 динари. Уходнїца за колективни нащиви 400 динари, док за пензионерох, дзеци од 7 до 12 роки, школярох и студентох котри Саям нащивя колективно 200 динари.

Фамелийни дзень будзе на нєдзелю, 14. мая, кеди родичи з дзецми до 16 роки Саям можу нащивиц з купованьом лєм єдней уходнїци за 600 динари.

ПОВЯЗАНИ ТЕКСТИ