Нови проєкт – еко-скравецка роботня

автор бхц
894 Опатрене

У Екуменскей гуманитарней орґанизациї (ЕГО) у Новим Садзе, того року, початком мая, почало ше реализовац єден нови проєкт под назву ЕКО (еколоґийна) скравецка роботня, а стреду, 8. авґуста, була його промоция и источашнє и вистава облєчива хторе настало у тей роботнї.

Од 2002. року, Екуменска гуманитарна орґанизация ше интензивно занїма помагаюци и даваюци потримовку особом зоз инвалидитетом, и то одроснутим особом з рижнима ступнями инвалидитета и за нїх ше орґанизує рижни файти активносцох – курси, правну и психолоґийну помоц, едукациї з обласци компютерох, асертивних технолоґийох, алє насампредз, орґанизує єдну роботну окупацийну програму.

То прето же би ше тоти особи чувствовали нє лєм хасновити, алє источашнє розвивали и свойо схопносци. Так же тот проєкт у рамикох Дньового пребуваня за особи з инвалидитетом у рамикох хторей ше шиє уникатни предмети за облєканє, шмати и модни додатки за жени зоз шмелим и ориґиналним модним стилом.

СКАПЧАНА СОЦИЯЛНА И ЕКОНОМСКА КОМПОНЕНТА

Уникати ше шиє зоз донираних, одруцених шматох и одруценого текстилу, зоз хторих наставаю цалком нови шмати (шоси, сукнї, блузни, рекли, панталони, лайбики и рижни файти ташнох).

– Идея нам була скапчац социялну и економску компоненту, два обласци роботи, скапчац особи зоз инвалидитетом и ресусрси, односно особи хтори ходзели на рижни курси за чийо ше едукациї купело машини и опрему, гоч зме дацо од опреми уж и мали, а друге – подзелїц половни шмати социялно загроженим особом, вибеженцом и шицким тим хторим така помоц потребна – гвари Мария Парнїцки, психолоґиня и координаторка Дньового пребуваня за ОСИ (особи з инвалидитетом) у ЕГО.

По Марийових словох, тот проєкт тирва од 10. мая 2017. и будзе тирвац по 10. май. 2018. року. То период пририхтованя за будуце социялне подприємство чий циль и тото цо би було у першим шоре, то же би ше задоволєло ориґинални модни потреби шмелих, аванґардних женох. Тиж, же би ше злєпшало социо-економске положенє особом хтори ше чежше запошлюю и хтори приходза зоз чувствительних, ранївих ґрупох и чежше ше социялно уключую до дружтва.

Предносц маю и особи хтори старши од 50 рокох, або хтори приходза зоз фамелиї у хторей єст особа з инвалидитетом. Окрем економского унапредзеня, з тим проєктом би ше могло обезпечиц и їх нєзависносц и змоцньовало би ше и їх самопочитованє и самовреднованє, як и социялна комуникация.

ЕКОЛОҐИЯ И ПРОМОЦИЯ ФЕР СПРАВОВАНЯ

Понеже ше вше глєда як ришиц одредзени проблеми у своєй локалней заєднїци, штредку, з тим подприємством би могло розришиц даєдни социялни проблеми. Треба надпомнуц и еколоґийну компоненту проєкта з хтору ше доприноши унапредзенє и очуванє животного штредку, як и зоперанє дальшого заґадзованя, а вшелїяк и промоция фер продукциї и тарґовини.

У тей роботнї заняти три шивачки, єдна главна и два помоцни, єден модни креатор, и 5-6 хаснователє, помоцни роботнїки хтори розшиваю шмати, складаю их, одшиваю и пришиваю ґомбички и прикраски. Приходза 2-3 раз до тижня.

Проєкт финансує Европска уния прейґ Каритасу Сербиї и Канцелария за сотруднїцтво зоз цивилним дружтвом Републики Сербиї, як и єден спонзор з Италиї, Ото пер Миле.

Шмати мож опатриц и купиц по вигодних ценох у ЕГО. Шлїдуюца промоция и вистава ше планує на Дзень означованя инвалидитета початком децембра.

ПЛАНУЮ И ОН-ЛАЙН ПРЕДАВАНЄ

У будучносци тим того екуменского и еколоґийного проєкта планує реґистровац дїялносц, направиц веб сайт и каталоґ продуктох, у другим року услужно шиц и шиц по наручбини, он лайн предаванє, даванє роботи новим особом и розвой подприємства.

15 TOTU EHO robotnja 1

ПОВЯЗАНИ ТЕКСТИ