Нєдовириє и страх

автор борис варґа
1k Опатрене

Розгварки зоз академиками Юлияном Тамашом и Павлом Робертом Маґочийом завераю єден циклус материялох, котри новини „Руске слово” обявйовали од лєта прешлого, 2016. року. Слово о 25-рочнїци од вельких пременкох у Юговосточней Европи, котри з падом комунизма порушали „нове националне будзенє” шицких народох цо були у социялистичним блоку, медзи нїма Руснацох и Українцох.

На тоту и други теми, на округлу рочнїцу, прешлого лєта бешедовали зме зоз амбасадором України Олександром Александровичом и єдним зоз сновательох Шветового конґресу Русинох/Руснацох/Лемкох Дюром Папуґом.

Руснаци у бувшей СФРЮ мали цалком иншаки третман, як гевти на Горнїци. Медзитим, зоз розпадованьом Югославиї и будзеньом балканских национализмох, Бачванско-сримски Руснаци постали жертви скоро шицких войнох, окреме у периодзе од авґуста 1991. по юний 1992. року. Першираз за два и пол децениї, новини „Руске слово” обявели детальну серию фельтонох и репортажох о виганяню Руснацох зоз Миклошевцох и Петровцох, алє и страданю Руснацох котри були воєно мобилизовани у Войводини.

У медзичаше ше война преселєла до України. Там тераз главна кризна точка у Европи, котра, за розлику од югославянскей войни, може прероснуц до озбильного медзинародного конфликту.

Шицки тоти материяли даю вам голєм часточни, алє комплексни одвит на питанє – яки политични статус Руснацох на Балкану и у Штреднєй Европи, а тиж и на тото яка интеракция представительох русинского руху и европскей України.

Новини „Руске слово” нє заступали анї єден бок, намагали ше буц нєутрални, професийни и читачом понукнуц думаня релевантних собешеднїкох. З виложеного, можеме заключиц же медзи карпаторусинским рухом и европску Україну иснує нєдовириє и страх – фрустрация од нєприпознаваня и подозривосц ґу сепаратизму.

Нє жадаюци преувелїчовац, по шицким судзаци, тот, ище вше бениґни реґионални проблем и надалєй будзе присутни, бо вон тераз индиректно повязани зоз заоштрованьом одношеньох медзи Києвом и Москву.

Пишце нам – redaktor@ruskeslovo.com.

ПОВЯЗАНИ ТЕКСТИ