Нєшка починаю Днї України у Новим Садзе

автор зам
2.1k Опатрене

НОВИ САД – У Новим Садзе нєшка починаю Днї култури України, буду тирвац по 23. май, а манифестацию орґанизує Амбасада України у Беоґрадзе, у сотруднїцтве з Городом Нови Сад, його институциями и установами. У одредзених сеґментох,  широка и богата програма будзе витворена и з помоцу Националного совиту Українцох у Сербиї, як и Союзу Руснацох Українцох Сербиї.

Днї култури України у Новим Садзе нєшка почню на 16 годзин з Параду вишивкох и народного облєчива – од Дунайского парку по Културни центер у Католїцкей порти у центре городу, дзе манифестация на 16,30 г. будзе и службено отворена, а тот перши дзень пошвецени презентациї України и Львова, як братского городу Нового Саду.

У рамикох Дньох култури України у Културним центре нєшка будзе отворена вистава „История одношеньох України и Сербиї”, як и отримани Округли стол „Нови Сад и українски реґиї – история и братименя”.

Под час манифестациї на рижних локацийох у Новим Садзе – у Матици сербскей, Кинотеки Културного центру, нашей грекокатолїцкей церкви, Културним центре, на площи опрез Городскей хижи, Туристичней орґанизациї Нового Саду, у Сербским народним театре, у Студию М РТВ, Музею Войводини, потим у Дунайским парку, Музею Нового Саду и у Историйним архиву Нового Саду буду рижни преподаваня, културни збуваня, музични програми, проєкциї филмох, вистави и туристични презентациї.

На Медзинародним польопривредним сайме у Новим Садзе вчера отримани и Дїловни форум „Сербия-Україна”, хтори отворел подпредсидатель Покраїнскей влади Дьордє Миличевич, а участвовали 34 домашнї и 22 компаниї з України.

На дзепоєдних округлих столох и културно-уметнїцких програмох буду участвовац и науковци з рускей заєднїци, як и КУД з дзепоєдних наших местох.

ПОВЯЗАНИ ТЕКСТИ