Нєшка представянє фотомоноґрафиї, на ютре Архиєрейска Служба

автор маф/злк/зам  фото шсл
792 Опатрене

РУСКИ КЕРЕСТУР/КОЦУР – У рамикох означованя 125-рочнїци снованя заєднїци шестрох Служебнїцох непорочней Дїви Мариї и 70-рочнїци їх Вице-провинциї св. Осифа у Сербиї, нєшка, 18. марца, у Коцуре у сали Месней заєднїци на 15,20 годзин будзе промоция Фотомоноґрафиї „Сто роки шестрох Служебнїцох у Коцуре“, авторки

ш. Михаили. У рамикох промоциї будзе и вистава малюнкох з тему живота шестрох Служебнїцох у манастире, хтори намальовали дзеци на подобовей роботнї коцурского здруженя младих „КУМ“, а шицки нащивителє достаню по прикладнїк Фотомоноґрафиї.

По промоциї шестри и вирни ше на Вельким, потим и на Старим теметове у Коцуре помодля за покойни шестри и добродїйох о. Андрея Лабоша и Дионизия Дороґхазия, а на 17,30 г. у герекокатолїцкей церкви будзе Вечурня. На шицки подїї поволани парохиянє и шицки заинтересовани.

Вчера, 17. марца, шестри були на паломнїцтве у Крижевцох, дзе 1906. року почали свою мисию на тих просторох, а там ше стретли и з крижевским владиком Николом Кекичом.

Централна програма шветочносци з нагоди ювилею шестрох Служебнїцох Непорочней Дїви Мариї, источашнє и закончуюца, будзе на ютре, на нєдзелю 19. марца, на Архиєрейскей Служби Божей у Катедралней церкви св. оца Миколая у Руским Керестуре, хтора почнє на 10 годзин.

Наявене же ютрейшу Архиєрейску Службу Божу будзе предводзиц папски нунций у Сербиї монс. Лучияно Сурияни, вєдно з нашим апостолским еґзархом, владиком Георгийом Джуджаром, крижевским владиком Николом Кекичом, скопским владиком Киром Стояновим, а можлїви приход и дзепоєдних других владикох.

Приход наявели и провинцийни шестри зоз Словацкей, України, провинцийни шестри Василиянки з Горватскей, монахи Василиянє з України, а обчекує ше и приход велїх священїкох и вирних.

У рамикох рочнїцох будзе означени и особни ювилей – 60 роки монашского живота ш. Вероники Гралюк, котра родом з Босней, длугорочней настоятельки, донєдавна и провинцийней настоятельки, а котра тераз пребува у Руским Керестуре.

ПОВЯЗАНИ ТЕКСТИ