Нїлаш пожадал успишни школски рок

автор ртв/мар
961 Опатрене

НОВИ САД – У новим школским 2017/2018 року, хтори почина нєшка, на териториї Войводини будзе коло 232 000 школярох. Настава ше будзе одвивац у 44-ох предшколских установох, 383-ох основних школох и 131-ей штреднєй школи, гварел покраїнски секретар за образованє, предписаня, управу и национални меншини- национални заєднїци Михаль Нїлаш жадаюци школяром и просвитним роботнїком успишни школски рок. Тиж додал же Покраїна того року вивоєла 589 милиони динари за злєпшанє квалитету воспитно-образовно роботи.

Наглашуюци же обазованє у Войводини засноване на длугокей традициї у мултикултуралним, вецейязичним и мултиконфесийним штредку, та окремна увага пошвецена школскому календару, хтори иншаки у АП Войводини. Так у школским 2017/18. року перше полроче будзе закончене пияток, 22. децембра 2017. року, а друге почнє стреду, 10. януара 2018. року.

Як виявел Нїлаш, пририхтуюца предшколска програма и образовно-воспитна робота у основних и штреднїх школох, попри на сербским, одвива ше и на мадярским, словацким, румунским, руским и горватским язику, та двоязично у национално мишаних штредкох. Тиж и на странских язикох, кед слово о билинґвалней настави, хтора тераз облапя 1 409 школярох у 14 установох.

Коментаруюци информацию о наявеним штрайку просвитних роботнїкох у дзепоєдних школох, Нїлаш надпомнул же штрайк нє одвитуюце средство за витворйованє правох занятих у просвити. Виражел наздаванє же у медзичаше будзе посцигнута одвитуюца догварка и же нє будзе штрайку, односно скраценя годзинох, цо нє добре за школярох, прето же так менєй науча, а познєйше то будзе чежко надополнїц.

ПОВЯЗАНИ ТЕКСТИ