Од конца ґу початку

автор иван сабадош 16. април 2018

Национални совит Руснацох на своїм зашеданю концом марца прилапел финансийни и програмни плани роботи за тот рок. Кед шицко будзе исц по планє, то би требал буц остатнї сет таких документох хтори приноши тото зволанє Совиту, понеже ше його штиророчни мандат закончує на єшень. То значи, найкратше поведзено, же ше насиґурно зна цо Совит будзе робиц по конєц мандату, и кельо за тоти активносци будзе пенєжу.

На фахових роботних целох Совиту тераз остава конкретизовац тоти плани у окремних „ресорох” и дїялносцох за хтори им зверени компетенциї. Дзепоєдни з нїх то уж зробели, други то поробя пошвидко, та бизме у доглядни час уж требали достац и тоти информациї, як и даяки биланс їх штиророчней роботи. Кед би ше уж тераз требало одлучиц цо найважнєйше цо зробене у предходним периодзе, то вироятно запровадзованє конкурсох и проєктного типу финансованя. Насампредз, ту обласц култури, як и обласц роботи з младима. Медзитим, витворйованє зарисованих планох нє єдине цо остало поробиц по конєц мандату Совиту и його целох. Єднак вельки задаток и обовязка и пририхтац заєднїцу за наступни виберанки.

Ище влонї на яр з ресорного министерства хторе задлужене за обласц сполньованя людских и меншинских правох було наявйоване же по порядни термин за виберанки нових националних совитох будземе мац комплетну нову законску реґулативу з тей обласци, присподобену ґу европским нормом и нашим практичним потребом. Тот процес затераз пожнї – циркулую даскельо роботни верзиї, нариси и предлоги нових законских ришеньох у обласци виберанковей процедури и компетенцийох националних совитох як ношителя меншинскей културней автономиї, алє ище нєт досц информациї же би ше могло формовац даяке кредибилне становиско чи процес идзе у добрим напряме, чи нє. Гоч шицко цо на концу будзе стац у тих законох барз важне и зоз формалного и зоз практичного аспекту сполньованя меншинских правох, можебуц ше уж тераз найбаржей треба фокусовац на питанє водзеня Окремного виберацкого списку – чи то будзе ствар особного (само)опредзелєня и мотивациї поєдинца же би ше уписал, чи робота компетентного державного орґану по службовей длужносци, а на основи податкох зоз Єдинственого виберацкого списку. Обидва приступи маю свойо основи и добри боки, алє мушиме благочасово знац же за хтори ше держава одлучела як єдини, же би ше з нього могло „вицагнуц” найвецей. Найгорше будзе кед пре дачию нєажурносц ришенє останє на пол драги, бо вец така будзе и робота.

(Опатрене 97 раз, нєшка 1)