Од Нєщешнїкох по Камене квеце

автор злк 17. авґуст 2017

Звуки рокенрола у Коцуре почали одгуковац шейдзешатих рокох прешлого вику, а єден з перших членох бенду котри почал грац на бубнох бул Силвестер Иґрачки – Иґи.

Свойо перши крочаї у рокенролу Силвестер повязує зоз периодом кед ище нє пошол до войска, кед у валалох коло Коцура, як и у векших городох, млади лєм почали оформйовац вокално-инструментални бенди у котрих звичайно були три ґитари и бубни. Так и у Коцуре оформени рок состав „Нєщешнїки” за хтори, як зме писали, найзаслужнєйши Стева Турински. Вон 1962. року позберал младих ентузиястох до першого електро-составу. Павле Байор, Янко Молнар, Михал Иван Мишка и Микола Киш – соло, ритам и бас ґитара, були перши у бенду, а хибел им бубнар. Накадзи Янко пошол до войска, до ґрупи поволани Иґрачки. Пристал, и од 1963. року почал з нїма грац.

Була то, памета Иґи, перша ґрупа младих аматерох, музичарох- ентузиязтох котри наступали на иґранкох у Коцуре, алє и у околних местох, дзе их млади барз крашнє прилапели и вешелєли ше на их наступох. Коцурци грали музику зоз филмох „Весели клуб младих”, потим „Апачи”, „Колєса”, „Танґо ґитари”, „Напульска ґитара”…. Понеже рокенрол бул познати у швеце, члени коцурского бенду на своїм репертоару мали рижни файти музичних жанрох, дорушуюци и брейк бит музику.

ЄДНИ ОДХОДЗЕЛИ ДО ВОЙСКА, ДРУГИ ШЕ ВРАЦАЛИ

„Нєщешнїки” полнєли Младежски доми так же було цесно на иґранкох полни два роки, а 1965. року госцовали на трецей „Червеней ружи” по шоре у Руским Керестуре.  И теди була велька чесц наступиц на тим руским фестивалу.

Истого року, кед бенд зохабел Павле Байор, котри ше вецей нє врацел грац, на його место пришол його власни брат Имре Байор. „Нєщешнїки” поставаю „Караван” и под тим меном два роки забавяю младих ширцом Войводини. Теди були популарни „Црвени корали”, та коцурски состав и їх шпиванки виводзел на своїх наступох. О рок, 1967. року, знова двоме члени,– Михал Иван и Имре Байор, мушели напущиц бенд пре одход до войска, а место нїх пришли Янко Молнар Дионизий Циґанїк. Дионизий, иншак бул побиднїк на змаганю „Микрофон ваш”,  котре було орґанизоване у Коцуре.

 – Состав ознова пременєл мено – „Белави гвизди”, и тот состав грал бит-забавну музику, мал вельо успиху у тим, водзаци ше зоз шветово познатима бендами як цо то „Битлси”, „Ролинґ Стонси”, „Енималси”, „Срчрси” – елита медзи музичарами – гвари Иґи,  додаваюци же состав под тим меном тирвал по 1967. рок, кед пришол час же би и вон пошол до войска.

– Пошол сом до войска, алє ше врацели Михал и Имре, на мойо место пришол Михал Буша и наш музични состав предлужел свою драгу заш под новим меном „Фловерстонси” (Камене квеце) – гвари Иґи.

Силвестер - Слухали зме и знїмали познати шветово бренди

Силвестер – Слухали зме и знїмали познати шветово бренди

НАСТУПИ И НАГРАДИ

Кед ше Силвестер врацел зоз войска, после 18 мешацох бенд преширел свой репертоар и успишно тирвал по 1971. рок. Истого року освоєли друге место на Ґитарияди у Жаблю, а мали успишни наступи и у Дироню, Савиним Селу, Туриї, Бачким Добрим Полю…

– Предлужел сом грац у бенду у котрим були Михал Иван – ритам ґитара и вокал, Яни Молнар – соло ґитара, бас ґитара бул Имре Байор, а и я шпивал и грал на бубнох. Познєйше Яни пошол до Австралиї, а до бенду вошол, тераз уж покойни Кирил Сакач. Седемдзешатих рокох состав напущел и Имре, а ми троме ище дакус грали – Михал, Кирил и я – памета Иґи.

ОПРЕМА СЦИГЛА З НЄМЕЦКЕЙ

Коцурски вокално-инструментални состав пременєл вецей мена, члени ше тиж зменьовали, гоч поправдзе, були добри приятелє, слухисти, котри нє патрели на пенєж и лєм сцели грац и зоз тим розвешельовац и себе и других. Пенєж котри заробели на наступох, або од наградох укладали до опреми, до инструментох и до квалитетного озвученя.

– Жадали зме младим у Коцуре, та и у Войводини, понукнуц найлєпше, та зме „знїмали” репертоари найпознатших шветових гвиздох и тот звук приношели по менших местох. Сцели зме мац и опрему на високим уровню, и паметам же теди на тарґовищу було вельо файти розгласох, но, ми надумали заробени пенєж уложиц до квалитетней опреми, та зме наручели каталоґ зоз Нємецкей. И нє лєм тото, наручели зме „Дина корд” розглас и пантлїкаш прейґ котрого ше шпивало, a теди то було вельке, бо лєм шветово гвизди мали таку опрему, и ми у Коцуре – памета Иґрачки. Та, лєм ше, после єдного периоду ризишли. Фамелийни обовязки каждого одцагли на свой бок.

„Фловерстонси” ше ознова зишли после 9 рокох паузи и почали отримовац проби под меном „Камене квеце” чию назву преложели з анґлийского. Два роки вежбали, дружели ше и грали, а вец и наступели у коцурским Младежским доме.

– Наступели зме на державне швето 29. и 30. новембра 1982. року и шицки хтори теди були млади, а нє забули на нас, пришли на наш наступ. Поприходзели млади и зоз других местох коло Коцура, а Младежски дом бул полни полнючки, як и нашо шерца – памета Иґи.

После того успишного наступу, члени бенду шедли побешедовац, а питанє було же цо далєй?!

28-29 IMG_20170708_143202– Видзели зме же зме нє професионалци, алє и тото же нас людзе заш лєм любя, та кед зме з любови ґу музики сцели заробиц, мушели зме почац грац по свадзбох, на балох, на леґиньских вечарох и подобних вешельох – памета наш собешеднїк. Постава ясне же єдини тедишнї рок бенд котри мал иншаку идею на самим початку свойого снованя, бул „прициснути” зоз вше чежшима обставинами у держави, препущени комерциялней, теди глєданей музики котру ше грало на свадзбох. Коцурска рок сцена остала празна. 

 

ОПТИМИСТИЧНИ РОЗХОД

„Фловернстонси” ше концом 1971. року дефинитивно розишли. Члени бенду постали фамелийни людзе котри вецей нє мали часу за одходи на фестивали, иґранки и вечарши забави, бо почали робиц, а як вецей раз спомнул и сам Иґи, вони грали з любови и вельо укладали до музики, до озвученя, до интрументох, одходох на забави, а коло фамелиї то вецей нє було виводлїве. Гоч ше бенд розишол, вони ше розишли зоз словами: „Дружтво, розиходзиме ше, алє нє значи же ше ознова нє зидземе”, цо ше познєйше и случело.

(Опатрене 160 раз, нєшка 1)