Од рочного стретнуца, по 13 турнири у сезони

автор александар паланчанин 11. марец 2017

Концом прешлого року у Дюрдьове означени 25 роки од перших Спортских бавискох „Яша Баков”. Пeрши бависка под тим меном отримани 1. авґуста 1992. року у Коцуре.  Одбавени були турнири у малим фодбалу и шаху. Од 1970. року до того часу то були спортски бависка НВУ „Руске слово”. Причина прецо ше их престало орґанизовац под меном нашей видавательней хижи, здогадуюци ше тих часох, углавним пре тедишнї политични обставини и подли економски стан у держави хтора ше розпадла.

Давного 1970. року, на спортских бокох „Руского слова” дакедишнї новинар и редактор Юлиян Каменїцки написал текст под насловом „Хто освої погар „Руского слова” у хторим медзи иншим пише:

„Внєдзелю (28. юния 1970. року)  ше у Руским Керестуре зишли представителє рускей фодбалскей репрезентациї Срима, СД „Славия” з Нового Орахова, СД „Искра” з Коцура и СД „Русин” з Руского Керестура. З тей нагоди прилапени пропозициї турнира, котри орґанизовани под покровительством „Руского слова”з Нового Саду, а у орґанизациї СД „Русин”з Руского Керестура. Тиж вицагнути и пари же хто з ким бави.

Так на соботу (4. юлия) на 15 годзин ше стретню фодбалере керестурского Русина и ораховскей Славиї, а на 17 годзин бави репрезентация Срима и коцурска Искра. Внєдзелю (5. юлия) на 15 годзин буду борби за треце и штварте место, а на 17 годзин финалне змаганє… На нєдзельовей схадзки заключене же би ше каждого року отримовал турнир на котрим би ше стретали фодбалски екипи з наших местох – писал Юлиян Каменїцки.

ПЕРШИ ТРОФЕЙ ОСВОЄЛ РУСИН

Фодбалски турнир орґанизовани на чесц 25-рочнїци „Руского слова”, а отворел го редактор спортскей рубрики Микола Каменїцки. През два днї, як призначене у „Руским слове”, на Ярашу штири екипи одмерали свойо моци и схопносци. Кажда екипа бавела анґажовано, а патраче мали нагоду видзиц квалитетни и красни фодбал. Указани рижни стили бависка, тактики, добри индивидуални бависка, ґолмански охрани и ефектни ґоли. Оценєне же турнир бул успишни, гоч финални змаганя дакус погубела хвиля, бо внєдзелю цали дзень падал диждж.

Перше место на турнире завжала екипа Русина, друге место освоєла екипа репрезентациї Сриму, треца була ораховска Славия, а штварта Искра з Коцура. У змаганьох за треце и штварте место Славия победзела Искру зоз резултатом 6:3 (2:2), а у финалним Русин победзел репрезентацию Сриму зоз резултатом 4:0 (1:0). Важне надпомнуц же змаганя успишно судзели Юлин Чакан и Йосип Сабо зоз Кули и Никола Родич зоз Липару.

Найвецей ґоли дал Стоїлькович, бавяч Славиї з Нового Орахова, а ґолман Русина, Томислав Регак, преглашени за найлєпшого чувара ґолу, бо нє достал анї єден ґол. Перши погар бавискох и припознаня найлєпшей екипи и поєдинцом на шветочносци уручел тедишнї директор НВУ „Руске слово” Микола Москаль.

Так закончена перша спортска манифестация хтора була отримана у рамикох означованя стриберного ювилея „Руского слова” и нашого фестивала „Червена ружа 70”. Була упишна, бо шицко цо ше жадало на тим турнире, витворене  – „же би ше спортисти з наших валалох раз рочнє стретали, же би ше упознали, сприятелєли, научели койцо єдни од других, ширели братство и єдинство, а з часом у каждим валалє преширели спортски традициї и утвердзели фундамент физичней култури”, заключел на концу Юлиян Каменїцки.

Микола Кучмаш уручує награди

Микола Кучмаш уручує награди

ИДЕЯ БАВИСКОХ ОТРИМАНА ДВАЦЕЦ РОКИ

– З часом ше преширйовало спорти у хторих ше змагали нашо спортисти. Оформйовали ше клуби по наших местох, та ше прето звекшовало число. Найпоряднєйши спорт бул шах, потим мали фодбал и фодбал, спортски риболов.  Домашнї турнирох були, так повесц, шицки нашо места. З тим основна идея бавискох, зблїжованєнаших спортистох, друженє, упознаванє и, теди барз значне, ширенє братства и єдинства, було сполнєте – гварел Микола Кучмаш, дакедишнї роботнїк НВУ „Руске слово”, орґанизатор бавискох и вельки шахиста.

Дзевяти Спортски бависка „Руского слова” отримани 1980. року. У наших новнох призначене же орґанизацийни одбор бавискох на своєй схадзки отриманей 27. юния у Новим Садзе одредзел термини и домашнїх турнирох. У Миклошевцох бул турнир у штреляцтве; змаганя у малим фодбалу, фодбалу, столним тенису и спортским риболове отримани у Руским Керестуре; у рукомету турнир бул у Коцуре.

Турнир у шаху у женскей и пионирскей конкуренциї  отримани 29. юния  у Петровцох. Истого дня кед бул отримовани Фестивал „Петровски дзвон”. Змагали ше штири екипи, а перше место освоєл ШК „Войводина” з Нового Саду (у женскей конкуренциї) хтори освоєли шицки 6 поени. У пионирскей конкуренциї ше змагали три екипи, а найлєпши бул ШК „Огньогашец” з Петровцох, хтори освоєл штири поени. Награди найлєпшим екипом и поєдинцом награди уручел Микола Кучмаш, хтори теди бул секретар Орґанизацийного одбору Спортских бавискох „Руского слова”.

Так було по 1988. рок кед нє отримани Спортски бависка и ушлїдзел зацих на наших спортских теренох хтори тирвал штири роки.

НОВИ МОЦИ

Пре тедишнї чежки обставини  початни ентузиязем окляпнул.

Нову инициятиву порушали ентузиясти повязани зоз Спортским дружтвом „Русин” зоз Руского Керестура. Зоз исту идею же би ше шицки Руснаци хтори прихильни ґу спорту и виказованю своїх схопносцох и на тот способ зблїжовали, упознавали и дружели. Резултати були важни, алє нє найважнєйши. Главне було друженє, а часто ше случовало, як и тераз, же на турнирох участвую и други народи и народносци.

Янко Хома

Янко Хома

– У маю 1992. року на инициятиву Дюри Лїкара, Здравка Бабича, Звонка Ерделя… спортистох и дїячох у спорту, зишли зме ше у Ремеселнїцким доме у Руским Керестуре. Пред тим зме вельо раз бешедовали о спортских бавискох, а жаданє нам шицким було же би ше их нє претаговало. Мушим надпомнуц же ше пред тим, два-три роки так повесц, анї нє отримовало бависка. Таки були часи, а мушим припознац же ше нїхто анї нє оздзивал по питаню орґанизациї спортских бавискох. Часто ше случовало же ше отримал лєм турнир у шаху, дзекуюци шахистом у СД „Русин” и Миколи Кучмаша. Но, потримовку зме теди достали од шицких спортских ентузиястох и розумлїво тедишнєй привредней и иншей инфраструктури у Руским Керестуре – гварел Янко Хома, хтори теди бул предсидатель СД „Русин”, а познєйше и директор школи у Руским Керестуре.

Под новим меном – „Яша Баков” почали нови часи бавискох. Нови ентузиязем допринєсол же би бависка достали прикмети медзинародних бавискох. На нїх участвовали екипи зоз Словацкей, України. Число спортох на бавискох було вше векше, а госци були и еминентни и вельки клуби як цо бул Одобйкашски клуб „Войводина”, хтора бавела на наших бавискох дзекуюци тедишньому директорови Клуба Мирославови Виславскийови.

Од теди по нєшка вельо того ше пременєло. Вшелїяк на лєпше.

Кед слово о найвекшим успиху бавискох, наймасовнєйши були 1998. року. Теди отримани штернац турнири у дзевец спортских конарох, у шицких катеґорийох возросту и пола. Змагали ше седемсто учашнїки зоз двацец местох. Важне надпомнуц же бависка нє були претаргнути анї под час войни 1999. року. Початна идея за отримованє наших Спортских бавискох, ентузиязем и любов ґу спорту прежили и тоту спокусу.

КОНКУРС ЗА ДОМАШНЇХ

– Спортски бависка „Руского слова” були популарни нє лєм медзи нами, Руснацами, алє и ширше. Кед були у своїм зениту, хто будзе домашнї турнира, ше виберало так же ше заинтересовани мушели явиц на конкурс хтори розписовал Орґанизацийни одбор СБ. Потим, мушим надпомнуц же од кеди ше почало отримовац Бависка було два спортски дисциплини – фодбал и шах. З роками ше звекшовало дисциплини до конца, по 1987. рок, кед отримани остатнї, було 6–7. З оглядом на тото же я бул найвецей задлужени за турнири у шаху, случовало ше же на турнире участвовали вецей як 100 шахисти. Тиж так домашнї турнирох часто були и места, як цо Канїжа, хтори нє маю вельо вязи зоз Руснацами. То гутори яки Бависка були популарни – гварел Микола Кучмаш.

(Опатрене 103 раз, нєшка 1)