Отримани перши Мемориялни турнир на Ярашу

автор мар
933 Опатрене

РУСКИ КЕРЕСТУР − Перши Мемориялни турнир у фодбалу „Владимир Малацко-Учо” на рускокерестурским Ярашу отримани всоботу, 19. мая, котри орґанизовали активисти Фодбалского клубу „Русин”, Желько Орос, Денис Гарди, Денис Югик, Мирко Надь, Александар Чизмар и Зденко Шомодї, з помоцу управи Фодбалского клубу, бавячох и спонзорох.

Змаганя були орґанизовани у двох катеґорийох, за старших пионирох родзених 2005. и младших родзених 2007. року. У обидвох катеґорийох ше змагали по пейц екипи. Медзи старшима пионирами перше место завжала „Славия” зоз Пиньвиц, друге домашнї „Русин”, треце „Будучносц” зоз Савиного Села, штварти бул „Текстилац”, а пияти „Лидер”, обидва клуби з Оджаку.

У катеґориї младших пионирох перше место освоєли фодбалере Фодбалского клубу „Лидер” з Оджаку, друге место припадло „Искри” з Коцура, треце „Славиї” зоз Пиньвиц, штварте и пияте домашнїм спортистом, „Русин” и „Русин 2”.

За найлєпших бавчох преглашени Матей Кршич (2007) з оджацкого „Лидеру” и Александар Тома (2005) з „Русину”. Ґолґетере змаганьох були Виктор Надь (2007) з „Русину” и Мартин Салчак (2005) бавяч „Славиї”. За найлєпших ґолманох преглашени Михайло Буила (2007) з коцурскей „Искри” и Мирко Ширка (2005) котри чувал мрежу „Славиї”.

Як дознава Рутенпрес, орґанизаторе перши Турнир орґанизовали у року кед ше означує 95. рочнїца Фодбалского клубу „Русин” зоз планом же би постал традицийни, а по спатраню на подобни турнири у околних местох.

ПОВЯЗАНИ ТЕКСТИ