О. Владимир Седлак меновани за заменїка Славонско-сримского викара

автор зам
858 Опатрене

ПЕТРОВЦИ (ГОРВАТСКА) – З декретом Ординарияту Крижевского владичества,  владика крижевски кир Никола Кекич 6. марца петровского пароха о. Владимира Седлака меновал за заменїка Славонско-сримского викара, зоз шицкима длужносцами и овласценями владического викара. Менованє ушлїдзело и пре чежшу хороту владического викара о. Якима Симуновича, пароха у Миклошевцох.

Нови вицевикар о. Седлак на тоту длужносц пришагал пред владиком у Заґребе 8. марца, кеди му уручени декрет и юрисдикция. Декрет явно пречитани 12. марца у Петровцох, а 14. марца обвисценє о тим менованю послате и шицким священїком Славонско-сримского викарияту.

О. Седлак (1983, Суботица) ше школовал у Суботици, Дякове и Риме, дзе закончел и постдипломски студиї з еклисиолоґиї. За священїка на службованє у Крижевским владичестве є пошвецени 2010. року у Коцуре, одкаль є походзеньом по мацери, з Мудрийовей священїцкей фамелиї.

Истого, 2010. року є меновани за пароха у Петровцох, попри порядней роботи бул член вецей комисийох Крижевского владичества и Дяковско-осиєцкого надвладичества, бул писар Славонско-сримского викарияту, духовнїк Здруженя католїцких интелектуалцох у Осиєку, скарбнїк за Каритас Сримского деканату.

Попри церковней роботи, о. Владимир Седлак активни и у дружтвеним живоце Руснацох у Горватскей. Оженєти є и ма двойо дзеци.

ПОВЯЗАНИ ТЕКСТИ