О бронзовим периодзе, алє и сучасносци

автор але 15. септембер 2017

У периодзе од двох тижньох у Городским музею у Вербаше буду приказани 11 филми зоз тематику археолоґиї и историї.

Од пондзелку, 4. септембра, та по 18. септембер, Городски музей у Вербаше орґанизує проєкциї филмох зоз 18. Медзинародней смотри археолоґийного филму. Филми ше указує каждого роботного дня на 18 годзин, а шицки проєкциї безплатни.

– Народни музей у Беоґрадзе орґанизує тоту смотру уж 18 роки и фаховци правя узши вибор, а  процедура же би ше филми презентовало ширцом других музейох досц єдноставна. Ми конкуровали зоз проєктом и вимога нам одобрена. Того року будзе уж пияти раз же ше таку подїю орґанизує у нашим музею и плануєме предлужиц таку праксу – гварела Весна Ґрґурович, кустос Городского музею у Вербаше.

Першого дня приказани филм „Доме, сладки трапезоидни доме” хтори бешедує о нашим, найпознатшим археолоґийним находзиску на Дєрдапу, Лепенски вир. Вовторок, 5. септембра, указани филм о бронзовим периодзе нашей историї, а у тим витвореню презентовани найновши одкрица зоз находзискох на териториї Словацкей. На стреду любителє филма мали нагоду опатриц интересантну проєкцию о старим городзе на Сицилиї хтори зоз помоцу сучасней 3Д технолоґиї на филме цалком реконструовани. Штварток, 7. септембра, приказане нємецке витворенє о криюмчареню драгоциних уметнїцких дїлох, а пияток филм о археолоґийних находзискох у нашей жеми на водоцеку Колубари.

plakataОд 11. септембра, почала интересантна животна приповедка о чловекови хтори цалком самостойно направел музей гайзибанох. Вовторок указани археолоґийни приказ о старим городзе, греческей колониї у Либиї. Стреду патраче мали нагоду видзиц филм о дакедишнїх методох за вирабянє алату зоз природних материялох (керамика, бронза, камень, косци, роги, скора…). На штварток, 13. септембра, будзе указана проєкция у хторей анализована моц дзепоєдних старих цивилизацийох, а на пияток сучасни, документарни филм о тим же як ше пенєж заробени од тарґовини зоз антиквитетами хаснує за финансованє терористичних ґрупох.

За остатнї дзень смотри, 18. септембер, охабене витворенє словацкого автора „Бронзови час, духовни живот и ритуали” у хторим патраче годни дознац яку улогу и уплїв мали шамани у живоце людзох зоз бронзового часу чловечества, а у филме приказани погребни обичаї и обряди.

– З оглядом на тематику филмох нащивеносц музею солидна. Вшелїяк же би було лєпше кед би ше гражданє ошмелєли и поряднєйше приходзели на проєкциї. Насампредз прето же наисце єст интересантни теми, алє и барз добри, цикави документарни форми – гварела Весна Ґрґурович.

Городски музей окрем проєкцийох за гражданство уведол и орґанизовани нащиви основних и стреднїх школох, та каждого дня филми опатра коло 100 гражданє.

(Опатрене 80 раз, нєшка 1)