Памятнїк Подунайским Швабом у Бачким Ярку

автор зам/ртв
992 Опатрене

БАЧКИ ЯРАК – У присустве премиєра Сербиї Александра Вучича, висланїка Нємецкей влади Гармута Кошика, амбасадор Нємецкей у Сербиї Аксела Дитмана, директора „Конрад Аденауер” фондациї за Сербию и Чарну Гору Норберта Бекман-Диркеса, предсидателя Скупштини АПВ Иштвана Пастора и предсидателя Покраїнскей влади Иґора Мировича, у Бачким Ярку (у темеринскей општини) всоботу, 6. мая, шветочно одкрите Спомин-означенє Подунайским Швабом котри страдали концом Другей шветовей войни.

Спомин-означенє поставене на инициятиву Союзного Здруженя Подунайских Швабох Нємецкей, а з помоцу и потримовку орґанох АП Войводини, Општини Темерин, Нємецкого здруженя „Св. Ґергард” зоз Зомбора и Националного совиту Нємцох у Сербиї.

4-Jarak-02

Бачки Ярак концом Другей шветовей войни бул претворени до концентрацийного лаґру за нємецких цивилох котри остали на подручох под югославянску власцу, и у нїм од 1944. по 1948. рок страдали коло 7 000 особи, углавним жени и дзеци.

– З одкриваньом того спомин-означеня правиме цивилизацийну розлику у одношеню на нашо дакедишнє справованє, алє и у одношеню на даєдни други народи. На тот способ указуєме же знаме виражиц почитованє ґу цудзим жертвом, бо лєм так будземе мац право вимагац же би ше почитовало и нашо жертви – гварел премиєр Александар Вучич, а з тей нагоди виражел и вельку подзековносц нємецкей канцеларки Анґели Меркел на шицкей помоци и потримовки хтору дала Сербиї.

Амбасадор Нємецкей у Сербиї Аксел Дитман визначел же факт же ше Нємци и Серби позберали на тим месце указує як зме далєко пошли у намаганьох же бизме ше помирели и звладали прешлосц, а предсидатель Здруженя Подунайских Швабох у Нємецкей Ганс Суприц же тот памятнїк источашнє знак почитованя ґу нєвиним жертвом и драгоказ ґу заєднїцкей Европи, у хторей шицки народи годни жиц у мире.

ПОВЯЗАНИ ТЕКСТИ