Перши електрични состав були „Kанонади”

автор маф 2. новембер 2017

На музичней сцени у Руским Керестуре перша хтора почала грац рокенрол була ґрупа „Канонади”, основана 1966. року. Споминали зме их и у прешлим чишлє зоз собешеднїком Владимиром Горняком Зезейом, хтори познєйше тиж бул їх член. Но пре обєктивни причини мушели зме прескочиц хронолоґию збуваньох.

У першей постави „Канонадох” вежбали Владислав Колошняї Ринґо на буґнох, Янко Ковач на бас ґитари, Яким Медєши Меґре на соло ґитари и Владко Гайдук Пейко на ритем ґитари. Нєодлуга Гайдук одходзи, место нього приходзи Дьордє Ковачевич Дьока и Владимир Венчельовски Бинди як шпивач. Аж у тим составе „Канонади” почали и наступац, а найдлужей ше и отримали, аж по 1969. рок. О нїх нам з тей нагоди буду собешеднїки Колошняї Ринґо и Венчельовски Бинди.

ЗА БУҐНИ ШЕДНУЛ МЕСТО БРАТА

Владислав Колошняї за буґни шеднул цалком случайно, як нам випроповедал. — Оцец ме раз послал по старшого брата Елемира хтори зоз пайташами вежбали у ткв. шмикнї. То була єдна простория у составе „Желєней загради” дзе през час велїм ґрупом стали иструменти и дзе ше вежбало. Мой брат грал на буґнох зоз Меґрейом, Гайдуком, Ковачом, а думам же ище анї нє мали мено. Шеднул я теди случайно за буґни, почал сом дуркац з обидвома руками, а Гайдук ми гвари же нє так, алє з тоту руку, так, а з другу так. Попачело ше ми, а брат грал можебуц дас пол рока. Мал дзивку, а вона любела танцовац, а нє шедзиц на иґранки, та вец мушел вибрац лєбо ю, лєбо буґни. Так я вошол до ґрупи место нього. А назвиско ми дали по бубнярови Битлсох Ринґови Старови.

Инструменти у тот час були углавним импровизовани, та и Ринґо памета же спочатку мал роздарту буґну та же би на ню зацагли нову скору: зограли ю зоз грушку за швиценє. Було и єдно „поячало”, алє „Канонади” були и перши прави електрични состав. – Спочатку сом мал лєм тот єдини єден танєр, палїчки, и нїч вецей. Вельку бас буґну зме нє мали, аж познєйше ше купело, та сом ше вец ознова учел, бо требало и ноги ускладзиц зоз руками. Учел сом ше и кед „Извори” з Кули приходзели грац, я вше при бини стал и патрел на їх бубняра як вон грає, бо вон мал комплетни буґни. Шицки зме були самоуки, нє було анї богзна кого най ци укаже — памета о своїх початкох Ринґо.

Владислав Колошняї – Ринґо

Владислав Колошняї – Ринґо

КЕД ПОШЛИ ДО ЛАЛИТЮ, ЯК КЕД БИ ПРИШЛИ БИТЛСИ

Як зме спомли, „Канонади” були перши хтори у Керестуре заграли прави рокенрол на елетричних инструментох. По Ринґових словох репертоар зоз хторим почали вежбац були углавним инструментали од популарних „Шедоусох” найкрасши им були „Плажа” и „Апачи”, а найвецей од домашнїх рок ґрупох як „Червени коралї”, док за шпивача нє пришол Бинди. Вец навежбали и велї други шпиванки, од „Силуетох”, „Джентлменох”, „Роботох”, „Ґрупи 220” зоз Драґом Млинарцом… Од „Стонсох” єдино грали „Сатисфакцию” и „Ласт тайм” и то, як гвари Бинди, нє у Керестуре и єдино дакус подшмелєни, бо ше ганьбели за свой анґлийски язик.

Од шпивача Венчельовския Биндия дознаваме же вон з екипу вежбац почал як петнацрочни, у септембру 1965. а наступац почали у идуцим року и були барз добре прилапени, поготов у сушедним Лалитю.  – Барз зме постали популарни у Лалитю дзе зме грали на двох местох;  Там кед зме пошли, як кед би пошли Битлси. Музикантом нє було чежко найсц дзивку. Аж зме ше дараз мушели и скривац од даєдней цо ше нам нє пачела – гвари през шмих Бинди. – Путовали зме вшелїяк, дахто нас привезол на авту, або на старим комбию, вельо раз и пешо, ґитара на плєцо, бо зме ґитари зоз собу ношели, а опрема нам там стала, бо зме там стално ходзели, и два раз у тижню. Познєйше и на порядним автобусу вечар там, рано назад. У Керестуре зме влєце наступали у „Желєней загради” лєм кед було дацо векше, як Кирбай, а през жиму зме грали у Мензи, у комбинатовей сали. Видзи ше ми же зме дас раз були и у Вербаше, Кули, Козари (Нова Кула) дзе зме єдней жими грали на якимшик балу, та нас одвезли з коньми на санкох, и паметам же зме буґни страцели у драже…

Популарносци „Канонадох” сиґурно доприношел и вше лєпши квалитет звука. З наступох уж мали и свой заробок, та кед ше ґу нїм место Меґрея придружел Владимир Горняк Зезе, почали набавяц и лєпшу опрему и инструменти. А як потвердзели и Ринґо и Бинди барз вельо и вежбали, и три раз до тижня.

– До музики югославянских рок ґрупох ше вше лєгчейше доходзело, бо ше почало видавац плочи. Плочи и я сам мал барз вельо, бо сом их поряднє куповал. И учели зме писнї найвецей зоз плочох. З часом на репертоаре зме мали и до 150 шпиванки и нє було бриґи грац на „иґранкох” цали вечар – приповеда Бинди.

Владимир Венчельовски – Бинди

Владимир Венчельовски – Бинди

НОВИ ЗВУК БУНТУ МЛАДИ ПРИЛАПЕЛИ

Як ше и обидвоме нашо собешеднїки здогадую нови рокенрол звук ше зоз шветовей сцени и у Керестуре и вшадзи дзе наступали барз швидко и лєгко „пресадзел” дзекуюци и їх наступом. – Ми имитирали познати югослваянски рок ґрупи, и у тот час я думал же то їх ориґинална музика. Аж познєйше сом дознал же и вони лєм прешпивйовали странски шпиванки на сербски. Так ми „поштредно” пресадзели до нас шветови рокенрол. Но власну музику зме ше нє усудзовали твориц у тот час. То було аж познєйше у „Ореолох” – толкує Бинди.

Бинди у „Канонадох” грал по марец 1969. док нє пошол до войска, а Ринґо предлужел и кед вони потим пременєли мено до „Саґураро 25-25”  и док и вон нє пошол до ЮНА. То бул конєц його рок кариєри.

Активовал ше ознова 1979. року кед го поволали з Дома култури на турнею до Бенелуксу. – Там сом предлужел грац, вец и у составе „Идеали” хтори наступал на балох и свадзбох, а нєшка сом член Хлопскей жридловей ґрупи и Хору у Доме култури.

Бинди после войска пошол робиц до Нємецкей. Док бул там Зезе му нє дал мира и ровно го волал най ше враци, та осную нови состав.

Ковач, Дьока, Меґре, Ринґо, Бинди 1966. року

Ковач, Дьока, Меґре, Ринґо, Бинди 1966. року

– О рок сом ше врацел, зблїжел ше з терашню супругу Ґенку а и пре Зезейово нагварянє остал сом и седем мешаци грал у новооформених „Ореолох”. Врацел сом ше зоз супругу до Нємецкей и 10 роки ище грал на ґитари и шпивал за свою душу. А любов ґу рокенролу ме трима и нєшка. Иншаку музику анї нє любим слухац. На ґитари и клавиятурох грає и мой син Кристиян хто жиє у Канади. – заключел Бинди.

НОВИ И ВАЛАЛСКИ ОБИЧАЇ

Познате же рокенрол представял бунт младежи на велї дружтвени норми тедишнього капитализма. Бунт окрем у новим музичним звуку бул виражени и у облєканю, шлєбоднєйшим справованю. Дознаваме же и у Керестуре дзивки дзечнє прилапели мини-сукнї, розпущени власи, а хлапци длугши власи. У чаше „Канонадох” у Керестуре млади „виплашели” потедишнї длугорочни обичай же на танцох дзе ше сходзела младеж, у сали доокола на лавкох шедзели мацери дзивчатох и припатрали ше з ким танцує и спатра ше їх дзивка. – Кед ми почали грац, то ше младим нє барзу пачело и помали преставало. Раз у „Желєней загради”, пред самим танцом активни у младежи Владимир Ковач (нєшка виклер) нароком офарбел уходну капурку од Маковского шора же би ше на ню залїпели мацери хтори уж лєм приходзели закуковац на капурку док була „иґранка” – дознаваме од членох „Канонадох”.

(Опатрене 191 раз, нєшка 1)