Подписани Протокол о сотруднїцтве АП Войводини и Републики Сербскей

автор мар
911 Опатрене

НОВИ САД – Предсидатель Покраїнскей влади Иґор Мирович и предсидателька Влади Републики Сербскей Желька Цвиянович вчера, 22 септембра, у Покраїнскей влади подписали Протокол о сотруднїцтве АП Войводини и Републики Сербскей.

– Подписованє Протоколу о сотруднїцтве подрозумює конкретизованє сотруднїцтва у вецей обласцох, понеже тримаме же за тим єст и простору и потреби, як и же вязи народох Републики Сербскей и Войводини то и вимагаю – гварел з тей нагоди Иґор Мирович.

Предсидатель Покраїнскей влади окреме визначел моцнєнє сотруднїцтва у обласци драговей инфраструктури, наглашуюци же приоритетни проєкти буду реконструованє гайзибанскей драги Шид-Бєлїна, поцагу Фрушкогорского коридору од Нового Саду по Руму, а потим прейґ Шабцу по Републику Сербску, цо и заєднїцка потреба за кратшима привреднима и транспортнима вязами.

Мирович додал же контролу витворйованя планованого з подписаного Протоколу о сотруднїцтве будзе надпатрац окремне заєднїцке роботне цело, док предсидателька Влади Републики Сербскей Желька Цвиянович наглашела же подписованє того документу будзе основа за велї конкретни ствари хтори буду реализовани у будучносци.

На вчерайшей схадзки у Покраїнскей влади члени делаґацийох розпатрали можлївосци за звекшанє сотруднїцтва у обласци култури, образованю, польопривреди, у черанки знаньох наукових институтох, повязованю универзитетох, туристичних орґанизацийох и черанки услугох у здравстве.

На вчерайшей схадзки и подписованю Протоколу присуствовали и подпредсидатель Покраїнскей влади Дьордє Миличевич, подпредсидателька Влади Републики Сербскей Сребренка Ґолич и числени члени владох обидвох делеґацийох.

9-APV-02

 

ПОВЯЗАНИ ТЕКСТИ