Помоц ше рушела як габа

автор маф 23. фебруар 2017

После того як на дружтвених мрежох обявени видео-прилог „Елион Медиї” з Беоґраду о чежкей ситуациї у якей ше нашли шестри Весна (24) и Нада (13) Новаковичово з Руского Керестура, реаґовали велї людзе добрей дзеки, як з Руского Керестура, так и з велїх других местох, аж и з иножемства.

Новаковичовим шестром  концом януара, нєсподзивано умарла мац, а уж велї роки як им и оцец покойни, та остали сами без даяких приходох, односно дочасовей социялней помоци, и у барз чежких условийох за живот, у хижи хтора нє их и хтора ше почала валяц. Весна закончела штредню школу пекарского напряму и уж роки є на бироу, а през лєто роби шицки сезонски роботи у валалє, док младша шестра Нада школярка шестей класи керестурскей ОШ.

Як дознаваме, такой реаґовал парохийни Каритас, хтори им роками помагал, та и тераз подаровал огриву, Школа „Петро Кузмяк” Нади обезпечела предлужене пребуванє з костираньом, а дочасово биваю у мацеровей шестри у Керестуре.

Дзекуюци спомнутому видео-прилогу на Фейсбуку, хтори за два днї мал скоро 62 000 препатрунки и велї дзелєня, орґанизовали ше поєдинци, хтори ше понукли координовац помоц. Реаґовали и подприємства, та дзивчатом сцигла перша помоц у поживи, огриви, облєчиву. Весни понукли и роботу на даскелїх местох, та як дознаваме, роби ше на тим же би могла робиц и лєгчейше ше старац о шестри.

Дзекуюци дружтвеним мрежом, як и прилогом у дньових новинох, на даскелїх телевизийох, та и нашому „Рутенпресу”, вистка о Новаковичових шестрох ширцом ше рознєсла як блїскавка. И о кратки час розляла ше права габа помоци хтора порушала велїх цо сцели помогнуц спрам своїх можлївосцох. На Младежским балу, як добредзечни прилог, назберани 13 000 динари, Школа пенєжни прилоги з новорочней гуманитарней акциї подаровала Нади, пенєжну помоц зберали и Керестурци цо жию у Канади.

Реаґовали и Месни и Општински одбори Сербскей напредней странки, хтори чийо представителє тиж нащивели шестри и принєсли им помоц у поживи и виявели же ше вєдно з локалну самоуправу буду намагац ришиц проблем биваня. Нащивел их и предсидатель Скупштини општини Кула Велибор Милоїчич хтори опатрел обисце дзе бивали и тиж обецал же ше риши биванє, найреалнєйше з купованьом половней, алє функционалней хижи.

Як дознаваме од Весни, од покойного оца им остала порта з фундаментами за хижу, та би найволєли там мац нови дом, но за тото потребни вельки пенєж. Дознаваме же их дзепоєдни приявели и до гуманитарней акциї „З Тамару до акциї” но там за тот рок места пополнєти.

Тим цо на даяки способ жадаю помогнуц Новаковичовим шестром  можу их найсц у їх нини, Ленїнова 165, лєбо контактовац Весну на тел. 061/22-55-795. Пенєжну помоц на отворени динарски рахунок у Комерциялней банки Беоґрад, число 205-9011006551887-72, лєбо на девизни рахунок тиж у Комерциялней банки: SWIFT-BIC KOBBRSBG IBAN/Account Number RS 3520590310234 1282442, Vesna Novaković, Petra Kuzmjaka 25, Ruski Krstur, Republic of Serbia.

(Опатрене 543 раз, нєшка 1)