Потреби Руснацох у сотруднїцтве з иножемством у обласци образованя

автор зам фото злр
918 Опатрене

БЕОҐРАД – Представителє Министерства просвити, науки и технолоґийного розвою на схадзки Координациї националних совитох националних меншинох вовторок, 5. септембра, представительом совитох винєсли же Министерство планує дац векшу увагу билатералним спорозуменьом медзи Министерством просвити Сербиї и ресорнима министерствами у матичних жемох меншинох хтори у Сербиї маю порядну наставу на своїм язику, так же национални совити маю придац свойо потреби у тей обласци.

Вязано за тоту проблематику, секретар Националного совиту (НС) Руснацох Таня Арва Планчак гварела же Министерство просвити упознате з нашу ситуацию, же Руснаци нє маю одредзену матичну жем, алє на вимогу Министерства, послати и потреби Руснацох у Сербиї по тим питаню.

– До Министерства зме послали нашо потреби за сотруднїцтвом з установами, лєбо державнима орґанами у других жемох на тим планє. Насампредз то можлївосц школованя штредньошколцох з України у нашей Ґимназиї, їх олєгчанше дальше студиранє у Сербиї, як и студиранє наших школярох у України и Словацкей по вигоднєйших условийох – гварела Арва Планчакова.

– Тиж так, виказали зме и потребу, односно можлївосц же би Руснаци з Горватскей до нашей жеми приходзели на штредньошколске школованє, лєбо студиранє на факултети у Сербиї, алє по олєгчаних условийох, а нє як странски державянє, та увидзиме цо з того будзе прилапене – гварела секретар НС Руснацох Таня Арва Планчак.

ПОВЯЗАНИ ТЕКСТИ