РУСКИ КЕРЕСТУР –Нєзависна продукция „Принцип прес” з Беоґраду вчера, 12. октобра, у Руским Керестуре почала знїмац материял за потреби емисиї „Од злата ябука” хтора пошвецена и националним меншином у Сербиї, а емитує ше на Явним сервису, РТВ Сербиї.
Як за Рутенпрес виявела новинарка и орґанизаторка знїманя Сладяна Новакович, „Принцип прес” уж од скорей видава троязични часопис „Сербия -Национална ревия”, (на сербским, анґлийским и русийским язику), а пред пар роками почали емитовац и єй ТВ виданє.
Часопис ше занїма з пестованьом културного скарбу и традициї насампредз сербского народу, а у ТВ виданю, хторе ше вола „Идентитети Сербиї”, зоз тима правима вредносцами других народох цо жию у Сербиї.
По словох Новаковичовей, циль им же би на таки способ, през интересантни приповедки, ширшей явносци представели национални заєднїци, же би их векшински народ упознал у позитивним шветлє и у їх идентитетох, и так баржей и прилапйовал.
За тот ТВ проєкт „Принцип прес” достал потримовку и Канцелариї за людски и меншински права, а на терену им партнере и национални совити.
У Руским Керестуре екипа „Идентитетох Сербиї” ше на перши завод опредзелєла знїмац цикави обєкти як цо Замок, Церква, Марийово святилїще Водица и други, а знїматель и монтажер Небойша Петрович и познати фотоґраф Драґан Боснич знїмали и зоз специялним дроном.
За Керестур ше опредзелєли по препорученю др Миряни Дєкич з Покраїнского заводу за защиту памятнїкох и члена Управного одбору Заводу за културу войводянских Руснацох, консултант им бул предсидатель ВО нашого Националного совиту Желько Ковач, а домашнї на терену и историчар Сашо Сабадош.
Директор нєзависней продукциї „Принцип прес” и главни и одвичательни редактор Мишо Вуйович, а емисия „Идентитети Сербиї” ше емитує премиєрно вовторками на 14 годзин на першей програми РТС-у, а репризно на другей програми нєдзелями на 10,30 годзин.
