По новим закону благши кари за менши потупеня у транспорту

автор блц/мар фото вев
800 Опатрене

БЕОҐРАД – Благши кари за менши потупеня, предлужене важенє пробней вожацкей дозволи, звекшана дошлєбодзена гранїца количества алкоголу у креви, лєм даєдни з вименкох Закона о транспорту хтори нєшка будзе тема у Скупштини Сербиї, пише „Блиц”.

Кари за менши потупеня скоро преполовени, а и надалєй дата можлївосц плаценя половки кари кед ше ю плаци у терминє од осем днї.

З вименками дошлєбодзени уровень алкоголу у креви будзе 0,2 промили, а векши як 2 промили будзе спатрани як насилне справованє у транспорту, за цо предвидзена кара до 120 000 динари и дзевец мешаци гарешту.

Кед Закон будзе прилапени, млади шофере з пробну вожацку дозволу буду вожиц два роки.

За дзеци висини до 135 центиментри обовязна гомолоґна шедалка, а за старши од 4 роки безпечна шедалка.

З вименками Закона, кед буду прилапени, будзе дошлєбодзене обегованє прейґ полней линиї – бициґлох, роботних машинох, тракторох и подобних превозкох хтори иду помалши.

Кара за воженє по застановююцей часци драги будзе зменшана зоз 100 000 до 120 000 динари, осем мешаци забрани воженя и 14 каребни поени на 20 000 до 40 000 динари, три мешаци забрани воженя и 6 каребни поени.

Нови закон предписує и векшу одвичательносц компетентних за отримованє драгох и прецизно дефинована мала чкода чия оправка менша як 200 000 динари.

Кед слово о потупеню огранїченей швидкосци, у зони дзе 30 километри на годзину, за звекшанє векше од 20 до 30 километри на годзину нова кара будзе 10 000 динари, а тераз є 3 000 динари за прекроченє од 11 до 30 километри на годзину. Прекроченє звонка населєня за 30 до 40 километри на годзину будзе покаране зоз 10 000 динари, за цо терашня кара од 6 000 до 20 000 динари.

ˮНайдрагши потупеняˮ би були пенєжна кара од 100 000 до 120 000 динари, 9 мешаци забрани воженя и 13 до 15 каребни поени, цо шлїдзи за обегованє превозки хтора препущує пешака, воженє без положеного вожацкого испиту, лєбо кед єст забрана на дозволи; воженє дзецка младшого од 12 роки на сошоферовим месце, або на месце хторе нє предвидзене за шедзенє; кед власнїк превозки нє да податки о особи котра направела потупенє з автом хтори хаснує, обегованє провадзеней колони и нєпочитованє правилох кед вас сцигнє провадзена колона.

ПОВЯЗАНИ ТЕКСТИ