Предсидатель Вучич нащивел Индустрию меса „Срим”

автор влдї
855 Опатрене

ШИД – Предсидатель Републики Сербиї Александар Вучич нащивел вчера, 9. авґуста, Индустрию меса „Срим” хтору у предликвидацийним поступку купели Индустриї меса „Аґропапук” зоз Куковцох, у шидскей општини и „Дюрдєвич” зоз Суботишта у печинацкей општини.

Вєдно зоз новима ґаздами – Братиславом Боґатичом и Миленком Дюрдєвичом, як и министром польипривреди Браниславом Недимовичом, предсидатель Вучич обишол продукцийни погони дзе є поинформовани о продукциї говедзини, а бешедовал и з дзепоєднима од коло 150 роботнїкох котри достали роботу.

Сербия у тим року ма можлївосц вивесц до Турскей 5 000 тони говедзини, а у 2019. року би тото количество мало буц звекшане на 10 000 тони.

Вучич нависцел же ресорне министерство звекша субвенциї за буяци и крави дойки и же будзе субвенционовац и прерабяцки капацитети у Сербиї, як и же звекшана одкупна цена буяцох на 2,4 еври за килограм живей мири.

После обиходу погонох, Вучич новинаром повторел же буду звекшани пензиї и плаци у явним секторе, а кед слово о Косове и Метохиї, же ше вон особнє заклада же би пришло до розгранїченя зоз Албанцами, як тирваце и найлєпше ришенє, алє же то нє завиши од Сербиї.

З оглядом же на єшень буду отримани виберанки за нове зволанє националних совитох, Вучич поволал припаднїкох националних меншинох же би участвовали на виберанкох и прейґ своїх националних совитох витворели свойо права, а держава помогнє у витворйованю тих правох.

ПОВЯЗАНИ ТЕКСТИ