Представа РНТ „Зазбероваче труплох” отворела 49. Драмски мемориял 

автор сен
970 Опатрене

РУСКИ КЕРЕСТУР – Руски народни театер (РНТ) „Петро Ризнич Дядя” всоботу, 18. марца, з премиєрним виводзеньом представи „Зазбероваче труплох”, хтору по тексту Звонимира Павловича режирали Михайло Зазуляк и Славко Орос, отворел тогорочни 49. Драмски мемориял Петра Ризнича Дядї.

Представа бешедує о остатнїх дзешец рокох живота др Гавриїла Костельника (одлично го ґлуми Михайло Варґа), од 1938. по 1948. рок и ошвицує велї ствари о нїм и його живоце хтори у народзе менєй познати. Приказани Костельниково ламаня и дїлованя у зраженю восточней и заходней цивилизациї, односно православя и католїцизма на просторе України, та його приватни, фамелийни живот, у хторим було вельо контроверзи и траґики.

Обробена тема наисце чежка, а мож повесц же за патренє представи треба мац и предзнанє о Костельникови и часох у хторих жил. Автор тексту, та и режисере представи „Зазбероваче труплох”, нароком у єдней мири ошвицели, а на другим боку патрачом охабели и одредзени дилеми о живоце и траґичним концу велїкана нашого язика и литератури.

1-Zazberovace-02

Понеже ше 2016. року наполнєли 130 роки од народзеня Гавриїла Костельника, тот проєкт и доприношенє РНТ „Петро Ризнич Дядя” означованю тей рочнїци, ище скорей визнечели режисере Зазуляк и Орос.

Публика у полней сали Дому култури з барз вельку повагу и емоциями провадзела представу, а цихосц и дожице претарговали лєм аплаузи на отвореней сцени. Мож повесц же з тоту представу РНТ достойно оправдує званє нашого националного театру, як и же початок Мемориялу було праве место за єй премиєрне виводзенє, цо источашнє и правиводзенє того Павловичового драмского тексту.

У представи ґлумя найдоберанши ґлумци рускей театралней сцени, як цо спомнути Михайло Варґа, котри того вечара достал и награду публики за найлєпше одбавену улогу; потим Михайло Зазуляк, Славко Орос, Ксения Макаї Орос, Емил Няради, Ненад Канюх, Владимир Надь-Ачим, Ксения Бодянец, Владимир Варґа, Александер Мудри, як млади ґлумци Андрей Орос, Ребека Планчак, Яким Винаї, Силвия Малацко, Иван Надь и Борис Будински.

Орґанизатор представи „Зазбероваче труплох” и монтажер видео-сеґментох Сашо Палєнкаш, суфлер и реквизитер Таня Арва Планчак, костимоґраф Таня Орос, майстор звука Владимир Бесерменї, шветла Желько Пашо, за репродукцию видео-сеґментох задлужени Павле Рац и Жарко Остоїч, а сценски роботнїки Дюра Хома и Борис Будински.

1-Zazberovace-03

(Вецей фотоґрафиї з представи у окремней ґалери на правим боку сайту).

ПОВЯЗАНИ ТЕКСТИ