Преображенє и Кирбай у Водици

автор маф
988 Опатрене

РУСКИ КЕРЕСТУР – У парохиї св. оца Миколая вчера преславене швето Преображенє Господнє, а внєдзелю у Водици и Кирбай римскей церкви Мариї Маджоре з котру Водица уж други рок у духовним заєднїцтве Марийових церквох.

На Преображенє у Катедралней церкви Служби Божо були на 8 и 19 годзин, а велька Служба була у Водици хтору служели о. Янко Колошняї з Канади и домашнї капелан о. Владимир Медєши, док парох о. Михайло Малацко споведал.

О значеню швета наказовал о. Колошняї и визначел же Преображенє значи же постої живот вични и же зме до ньго шицки поволани. По Служби священїки окончели и обряд пошвецаня овоци котри принєсли парохиянє, а хтори ше окончує на тото швето.

Внєдзелю, 5. авґуста, у Водици преславене и храмове швето римскей базилики Мариї Шнїговей зоз хтору Водица у духовним заєднїцтве, та прето означує и єй Кирбай на хтори вирни можу достац одпуст.

Службу Божу служел о. Колошняї, а наказовал о. Медєши котри наглашел важносц пребачованя. Медєши и споведал вєдно з парохом о. Малацком. На обидвох Службох було надосц вирних, а поготов на Преображенє.

ПОВЯЗАНИ ТЕКСТИ