Проблематични статус и способ финансованя Рускей матки

автор Дюра Папуґа 22. май 2017

Руска матка основана 28. децембра 1990. року як дружтвена орґанизация од окремного националного интересу за Руснацох, по угляду на Матицу сербску и Матицу словацку, хтора основана истого року у юнию мешацу. Руска матка теди мала окремни статус як и други славянски матки у тедишнєй нашей держави и мала порядне финансованє порядних активносцох зоз буджету АП Войводини и буджету Републики Сербиї. Од снованя Руска матка нєпреривно запровадзує активносци на очуваню руского/руснацкого идентитета и подзвигованю рускей/руснацкей свидомосци.

Руска матка од 2011. року урядово реґистроване здруженє гражданох зоз шедзиском у Руским Керестуре, зоз основни цильом запровадзованя и координованя активносцох на очуваню идентитета Руснацох у Републики Сербиї. Реґистрована обласц витворйованя цильох Рускей матки у Реґистру здруженьох у Аґенциї за привредни реґистер Републики Сербиї у Беоґрадзе то пестованє, розвиванє и популаризованє руского язика, писма, култури, науки, литератури, образованя, уметносци и традицийох. Алє од теди Руска матка и други славянски матки у АП Войводини нє маю ришене финансованє порядних активносцох, алє су унапрямени на пририхтованє проєктох и їх посиланє на конкурси покраїнских секретариятох за културу и информованє, за образованє, управу, предписаня и витворйованє правох националних меншинох у АП Войводини и Министерства култури и информованя Републики Сербиї.

У прешлих трох рокох од кеди ше проєкти славянских маткох и шицких других културно-уметнїцких установох, орґанизацийох и здруженьох у АП Войводини посилаю на консултативне розпатранє до националних совитох националних меншинох у АП Войводини и утвердзованє предкладаньох за одоброванє средствох, Руска матка, алє и Матица словацка, Бунєвацка матица, маю нїяке, або барз скромне финансованє по тих поднєшених проєктох.

До пред трома роками зоз Националного совиту рускей националней меншини у Републики Сербиї Руска матка доставала по 100 тисячи динари рочно,  50 тисячи за порядну дїялносц и 50 тисячи динари за путованя до иножемства (одходи на зашеданя Шветовей ради Русинох/Руснацох/Лемкох (РРЛ) и зашеданя комисийох Шветового конґреса РРЛ). Пред двома роками тоти средства зменшани на вєдно 70 тисячи динари, а того року лєм на 30 тисячи динари за порядну дїялносц, а за путованя до иножемства нє одобрене нїч.

Прето зме заєднїцки зоз Матицу словацку, Бунєвацку матицу и Матицу сербску у марцу прешлого року пробовали заєднїцки виложиц тоту проблематику, алє и тоти даскельо представнїки покраїнских секретариятох на тим нашим викладаню у шветочней сали Матици сербскей у Новим Садзе витримали лєдво 15 минути, а вец мушели пойсц пре други, озда важнєйши роботи.

Окремни стретнуца и розгварки о тих питаньох прешлого року делеґация Рускей матки мала у авґусту прешлого року у Покраїнским секретарияту за културу, информованє и одношеня з вирскима заєднїцами, а потим, 9. новембра прешлого року и стретнуце и розгварки зоз Иґором Мировичом, премиєром Покраїнскей влади АП Войводини, дзе нам обецане запровадзованє активносцох на ришованю статуса славянских маткох у АП Войводини и способу їх финансованя у 2017. року. 

Руска матка и у 2017. року свою активносц будзе запровадзовац у месних одборох Рускей матки у Руским Керестуре, Кули, Коцуре и Вербаше, Городским одборе Рускей матки у Новим Садзе и Реґионалним одборе Рускей матки за Срим у Шиду.

Окремна увага у роботи Рускей матки того року будзе пошвецена пририхтованю за участвованє делеґациї Рускей матки на XIV Шветовим конґресу РРЛ и VIII Шветовим форуму русинскей младежи, хтори буду отримани од 29. юния по 2. юлий 2017. у Осєку, у Републики Горватскей. Делеґацию Рускей матки буду твориц 10 делеґати, 5 госци и 5 млади, члени Форума младих Рускей матки.

Финални пририхтованя за XIV Шветови конґрес РРЛ и VIII Шветови форум русинскей младежи буду запровадзени  од 5. по 7. май у Винковцох и Старих Янковцох, дзе буду отримани зашеданя Шветовей ради РРЛ, Комисиї за културу ШК РРЛ, Ревизийней ради ШК РРЛ и Ради Шветовогуо форума русинскей младежи.

У видавательней дїялносци у 2017. року Руска матка планує пририхтованє и видаванє штирох числох глашнїка Рускей матки „Руснак”. На конкурс Министерства култури и информованя Републики Сербиї Руска матка пририхтала и послала проєкт за софинансованє пририхтованя и друкованя штирох числох глашнїка Рускей матки „Руснак”.

На конкурси до покраїнских секретариятох АПВ за 2017. рок Руска матки пририхтала вецей проєкти: Орґанизованє II Русинского филмского фестивалу „Русин Филм Фест” у Шиду и Подобовей колониї „Коцур 2017”, а тиж и финансованє одходу делеґациї Рускей матки на XIV Шветови конґрес РРЛ и VIII Шветови форум русинскей младежи у Осєку, у Републики Горватскей, и софинансованє порядней дїялносци Рускей матки.

На конкурс Заводу за културу войводянских Руснацох Руска матка пририхтала и послала два прияви:  Пияти Днї театра „Владимир Сабо-Дайко” у Коцуре и пририхтованє театралней представи за младеж и одроснутих под насловом „Жени”.

На конкурс Општини Кула за национални заєднїци Руска матка планує поднєсц єден проєкт: Стретнуце поетох, литературних и подобових творительох Рускей матки.

У Рускей матки у 2017. року плановане и участвованє єй представнїкох на тогорочних зашеданьох Шветовей ради РРЛ, як и медзиконґресних зашеданьох конґресних комисийох за просвиту, културу, информованє и видавательну дїялносц, за историю Русинох и Комисиї за медзисобне сотруднїцтво и туристични розвой Шветового конґресу РРЛ.

На зашеданю Шветовей ради РРЛ першого викенду у марцу того року були зме зоз пожичених пенєжох, на исти способ участвовали зме 23. априла на преслави Дня Русинох у Мукачеве на Закарпатю у України, а так будзе и зоз одходом на наступни зашеданя у Винковцох и Старих Янковцох.

А як пойдземе на XIV Шветови конґрес Русинох/Руснацох/Лемкох и VIII Шветови форум русинскей младежи у Осєку, у Републики Горватскей, нє зна ше, бо ище нїхто нє дава нїяки одвит.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 139 раз, нєшка 1)